ایپل واں برس امریکا اور کینیڈا میں اپنی میپنگ سروس ایپل میپس پر اشتہارات متعارف کرانے جا رہی ہے۔کمپنی کے مطابق اس نئے فیچر کے تحت صارفین کو میپس پر تلاش (سرچ) کے دوران آرگینک نتائج کے اوپر اسپانسرڈ مواد بھی دکھایا جائے گا۔ اس کا مطلب یہ ہے کہ جب صارف کسی مقام یا سروس کو تلاش کرے گا تو متعلقہ کاروبار اپنے اشتہارات کے ذریعے نمایاں طور پر سامنے آ سکیں گے۔ایپل کی جانب سے جاری بیان میں کہا گیا ہے کہ یہ اقدام کمپنی کے سروسز سیکٹر کو مزید وسعت دینے کی حکمت عملی کا حصہ ہے، جو پہلے ہی کمپنی کی آمدنی کا ایک بڑا ذریعہ بن چکا ہے۔ تاہم کمپنی نے ابھی تک اس نئے ایڈورٹائزنگ منصوبے سے متوقع آمدنی یا اس کے مالی اثرات کے بارے میں کوئی تفصیلات فراہم نہیں کیں۔مزید یہ کہ کمپنی نے یہ بھی واضح نہیں کیا کہ اس کی تقریباً ڈھائی ارب فعال ڈیوائسز میں سے کتنے صارفین باقاعدگی سے ایپل میپس استعمال کرتے ہیں، جس سے اس فیچر کے ممکنہ اثرات کا مکمل اندازہ لگانا فی الحال مشکل ہے۔ٹیکنالوجی تجزیہ کار گل لاؤریا کے مطابق ایپل میپس میں اشتہارات کا اضافہ کمپنی کے لیے ایک نیا مالی موقع ثابت ہو سکتا ہے۔ ان کا کہنا ہے کہ چونکہ ایپل پہلے ہی اپنی آمدنی کا بڑا حصہ سروسز بزنس سے حاصل کرتی ہے، اس لیے یہ اقدام اس شعبے کی مزید ترقی میں اہم کردار ادا کر سکتا ہے۔ماہرین کا ماننا ہے کہ اس فیصلے سے نہ صرف ایپل کے ریونیو میں اضافہ ممکن ہے بلکہ ڈیجیٹل ایڈورٹائزنگ کے شعبے میں کمپنی کی موجودگی بھی مزید مضبوط ہو جائے گی، جہاں پہلے ہی دیگر بڑی ٹیک کمپنیاں سرگرم ہیں۔
