امریکا کے شہر سان ڈیاگو سے تعلق رکھنے والی ایک کلب ڈانسر چارم ڈیز کی ٹک ٹاک ویڈیو نے انٹرنیٹ پر طوفان برپا کر دیا ہے، جس میں انہوں نے دعویٰ کیا ہے کہ نوجوان امریکی فوجی اپنی اگلی تعیناتیوں اور مشرقِ وسطیٰ میں ایران کے خلاف ممکنہ جنگی مشن کے حوالے سے حساس معلومات عام جگہوں پر شیئر کر رہے ہیں۔
لاکھوں بار دیکھی جانے والی اس ویڈیو میں چارم نے بتایا کہ حال ہی میں بڑی فوجی چھاؤنیوں کے قریب واقع کلبوں میں اُداس اور پریشان حال فوجیوں کا رش بڑھ گیا ہے جو اپنی روانگی سے قبل بڑی رقم خرچ کر رہے ہیں۔
ان کا کہنا تھا کہ کئی نوجوان فوجیوں نے انہیں صاف بتایا کہ وہ اگلے ہفتے ایران کے خلاف محاذ پر روانہ ہو رہے ہیں، جن میں سے کئی بہت ہی کم عمر اور معصوم شکلوں والے ہیں۔
سان ڈیاگو کا علاقہ امریکا کے بڑے فوجی مراکز کے قریب واقع ہے جہاں بحری اور زمینی فوج کے اہم اڈے موجود ہیں۔
اس ویڈیو کے سامنے آنے کے بعد یہ قیاس آرائیاں تیز ہو گئی ہیں کہ صدر ڈونلڈ ٹرمپ کی جانب سے تہران پر بڑھتے ہوئے فوجی دباؤ کے پیشِ نظر امریکا کسی بڑی عسکری کارروائی کی تیاری کر رہا ہے۔
رپورٹ کے مطابق ہزاروں اضافی امریکی فوجی، جن میں میرین یونٹس اور ایلیٹ فورسز شامل ہیں، پہلے ہی خطے میں پوزیشن سنبھال چکے ہیں۔
امریکی عوام میں اس ممکنہ جنگ کے حوالے سے شدید بے چینی پائی جاتی ہے اور کئی خاندان اسے ایک غیر ضروری تنازع قرار دے کر اپنے پیاروں کی زندگیوں کے بارے میں فکر مند ہیں۔
فوجی ماہرین اور سابق اہلکاروں نے ان معلومات کے اس طرح عام ہونے پر سخت تشویش کا اظہار کیا ہے اور اسے سیکیورٹی کے اصولوں کی خلاف ورزی قرار دیا ہے۔
ایک سابق میرین افسر کاگن ڈنلپ نے سوشل میڈیا پر فوجیوں کو خبردار کیا کہ وہ نائی، ہوٹل یا کسی بھی تفریحی مقام پر اپنی روانگی کی تاریخوں، مقامات اور مشن کے بارے میں بات نہ کریں، کیونکہ عام لوگ ان باتوں کی نزاکت کو نہیں سمجھتے اور اسے سوشل میڈیا پر پوسٹ کر دیتے ہیں جس سے دشمن کو اہم معلومات مل سکتی ہیں۔
اگرچہ پینٹاگون کی جانب سے ان معلومات کی باقاعدہ تصدیق نہیں کی گئی اور ویڈیو بنانے والی خاتون نے اسے محض ایک ذاتی مشاہدہ قرار دیا ہے، لیکن اس واقعے نے اس حقیقت کو واضح کر دیا ہے کہ اسمارٹ فونز اور سوشل میڈیا کے دور میں فوجی رازوں کو چھپانا کتنا مشکل ہو چکا ہے۔
اس ویڈیو نے جہاں ایران کے خلاف ممکنہ زمینی جنگ کے خدشات کو بڑھا دیا ہے، وہیں ان نوجوان فوجیوں کے نفسیاتی دباؤ اور ان کے خاندانوں کے دکھ کو بھی دنیا کے سامنے نمایاں کر دیا ہے جو اپنے پیاروں کو نامعلوم خطرات کی طرف بھیجنے پر مجبور ہیں۔
