دبئی, پاکستان مسلم لیگ (ن) منارٹی ونگ کے ہیڈ اور پاکستان کرسچن الائنس کے صدر جان قادر کی زیرِ صدارت 23 مارچ یومِ پاکستان کے موقع پر دبئی میں ایک خوبصورت اور پروقار تقریب کا انعقاد کیا گیا۔ اس پروگرام کا اہتمام پاکستان کرسچن الائنس اور پاکستان مسلم لیگ (ن) منارٹی ونگ کے عہدیداران و اراکین نے مشترکہ طور پر کیا۔
تقریب کا آغاز دعا سے کیا گیا جس کی قیادت ایوینجلسٹ ذیشان سلطان نے کی۔ دعا میں پاکستان کی ترقی، سلامتی، امن اور استحکام کے لیے خصوصی دعائیں کی گئیں، جبکہ دنیا بھر میں بسنے والے تمام انسانوں کے لیے بھی خیر و برکت اور امن کی دعائیں مانگی گئیں۔ اس موقع پر حکمرانوں کے لیے بھی دعا کی گئی کہ خدا انہیں صحت، حکمت، دانائی اور فہم عطا فرمائے تاکہ وہ عوام کی بہتر انداز میں خدمت اور حفاظت کر سکیں۔تقریب میں مختلف مقررین نے اپنے خیالات کا اظہار کیا۔ سینئر نائب صدر شاہد پرویز نے اپنے خطاب میں امن، بھائی چارے اور ہم آہنگی کی اہمیت پر زور دیا۔ نائب صدر ذیشان سلطان اور مشیر سیکرٹری عظیم یونس نے بھی اپنے خیالات کا اظہار کرتے ہوئے پاکستان اور یو اے ای کے درمیان دوستی کو مزید مضبوط بنانے کی ضرورت پر زور دیا۔
اس پروگرام میں روبن شریف اور بشارت مسیح سمیت دیگر معزز شخصیات نے شرکت کی۔ خواتین ونگ کی نمائندگی مسز مسرت جان، سمینا، زیشان سلطان، برشنا عظیم، ثائمہ اور مسز روبن شریف نے کی، جبکہ بچوں کی بڑی تعداد نے بھی شرکت کرکے پروگرام کو رونق بخشی۔تقریب نہایت خوشگوار ماحول میں کامیابی کے ساتھ اختتام پذیر ہوئی۔ آخر میں پروگرام کے اختتام پر 23 مارچ یومِ پاکستان کے حوالے سے کیک بھی کاٹا گیا۔
آخر میں پاکستان اور یو اے ای کی دوستی کے استحکام کے لیے نعرے لگائے گئے۔
