نادرا نے واضح کیا ہے کہ کمپیوٹرائزڈ قومی شناختی کارڈ (سی این آئی سی) کا ڈیجیٹل ورژن بھی قانونی طور پر اصل شناختی کارڈ کے برابر حیثیت رکھتا ہے۔
نادرا کی جانب سے جاری بیان کے مطابق شناختی کارڈ کا ڈیجیٹل ورژن اس کی موبائل ایپ پاک آئی ڈی کے ذریعے حاصل کیا جا سکتا ہے اور اسے قانونی طور پر وہی حیثیت حاصل ہے جو فزیکل شناختی کارڈ کو حاصل ہوتی ہے۔
نادرا نے تشویش ظاہر کی کہ اب بھی کئی دفاتر اور سروس فراہم کرنے والے ادارے ڈیجیٹل شناختی اسناد قبول کرنے سے انکار کر رہے ہیں اور شہریوں سے اصل شناختی کارڈ یا اس کی فوٹو کاپی طلب کرتے ہیں، جو موجودہ قانونی فریم ورک کی خلاف ورزی ہے۔
ادارے نے تمام سرکاری محکموں، عوامی اداروں، مالیاتی اداروں، ٹیلی کام کمپنیوں اور نجی سروس فراہم کرنے والوں پر زور دیا کہ وہ اپنے طریقہ کار کو تازہ ضوابط کے مطابق بنائیں اور اپنے ماتحت دفاتر کو واضح ہدایات جاری کریں۔
بیان میں کہا گیا کہ اگر کسی شہری کو ڈیجیٹل شناختی کارڈ قبول نہ کیے جانے کا سامنا ہو تو وہ نادرا کے سرکاری چینلز کے ذریعے شکایت درج کرائیں تاکہ اس پر اصلاحی کارروائی کی جا سکے۔
