مشرق وسطیٰ میں ایران، امریکا اور اسرائیل کے درمیان جاری کشیدہ حالات مزید تشویش ناک ہو گئے ہیں۔ ایرانی صدر مسعود پزشکیان نے روسی صدر ولادیمیر پوتن سے ٹیلی فون پر رابطہ کیا، جس میں علاقائی سلامتی، موجودہ جنگی صورتحال اور ممکنہ سفارتی اقدامات پر تبادلہ خیال کیا گیا۔
اس دوران امریکا اور اسرائیل کی فضائی کارروائیاں، ایران کی جوابی کارروائیاں، اور خطے میں عسکری نقل و حرکت کی اطلاعات نے صورت حال کو نہایت نازک بنا دیا ہے۔
ایران اور روس کی اعلیٰ سطحی بات چیت
ایران کے صدر مسعود پزشکیان نے روس کے صدر ولادیمیر پوتن سے ٹیلی فون پر رابطہ کیا، جس میں علاقائی سیکیورٹی، موجودہ جنگی صورت حال اور ممکنہ سفارتی اقدامات پر تبادلہ خیال ہوا۔ یہ بات چیت تنازع کے تیزی سے پھیلنے کے دوران ہوئی، جس سے ظاہر ہوتا ہے کہ ایران اپنی بین الاقوامی حمایت کو مضبوط بنانے کی کوشش کر رہا ہے۔
دوسری طرف امریکا کا سب سے بڑا طیارہ بردار جہاز یو ایس ایس جیرالڈ فورڈ بحر احمر کے لیے بحیرہ روم سے روانہ ہو چکا ہے۔ جس کا مقصد جنگی سرگرمیوں میں تیزی لانا اور عسکری قوت کو مضبوط کرنا ہے۔
قطر: فلائٹ روٹس جزوی طور پر بحال
قطر کی جنرل اتھارٹی آف سول ایوی ایشن نے ’ایمرجنسی ایئر روٹس‘ کے ذریعے فضائی ٹریفک مرحلہ وار بحال کرنے کا اعلان کیا ہے۔ اس فیصلے کا مقصد ہوائی سفر کو محدود صلاحیت کے ساتھ بحال کرنا ہے، جو کہ خطے میں جاری لڑائی کی وجہ سے پہلے سخت متاثر ہوا تھا۔
عراق کے اربیل میں ہوٹل پر ڈرون حملہ
عراق کے کردستان علاقے کے شہر اربیل کے مشہور ہوٹل ’ ارجان بائے روتانا ‘ پر ڈرون حملہ ہوا، جس کے بارے میں ذرائع نے بتایا کہ ایران سے منسلک عسکری گروہوں نے اسے انجام دیا۔ بغداد میں امریکی سفارت خانے نے بھی خبردار کیا ہے کہ عراق کے شمالی علاقوں میں غیر ملکیوں کو نشانہ بنانے کی کوششیں بڑھ سکتی ہیں۔
