برازیل کی معروف فٹبال کھلاڑی کیتھلین سوزا نے اسلام قبول کرنے کے بعد عمرہ کی سعادت حاصل کر لی۔
کیتھلین سوزا جو سعودی عرب کی ٹیم النصر خواتین کی نمائندگی کرتی ہیں، نے اس اہم موقع پر اپنے جذبات کا اظہار کرتے ہوئے کہا کہ وہ زندگی میں صحیح راستہ تلاش کرنے اور اپنی بہترین شخصیت بننے کی کوشش کر رہی ہیں۔
سعودی فٹبال کلب النصر نے ویڈیو سوشل میڈیا پر شیئر کرتے ہوئے لکھا کہ ہم کیتھلین سوزا کے اس خاص لمحے کو آپ سب کے ساتھ بانٹتے ہیں جب انہوں نے اسلام قبول کیا۔ دعا ہے کہ اللہ انہیں استحکام عطا کرے اور ان کے دل کو سکون و اطمینان سے بھر دے۔
کیتھلین نے اپنی انسٹاگرام پوسٹ میں کہا ’چھوٹے قدم، صحیح راستہ تلاش کرنا، تبدیلی کی کوشش، اور زندگی کے انعام کے لیے شکرگزاری‘۔
کیتھلین نے فٹبال کا آغاز بچپن میں برازیل میں کیا اور مختصر طور پر سانتوس ایف سی کی یوتھ ٹیم کا حصہ رہیں۔ بعد ازاں انہوں نے امریکا میں یونیورسٹی آف لوئیز ویل اور یونیورسٹی آف سینٹرل فلوریڈا سے تعلیم حاصل کی اور وہاں بھی فٹبال کھیلیں۔
برازیلین فٹبالر گزشتہ 2 سال سے سعودی فٹبال کلب النصر کا حصہ ہونے کی وجہ سے سعودی عرب میں موجود ہیں اور انہوں نے اسلامی اقدار سے متاثر ہو کر اسلام قبول کرنے کا فیصلہ کیا۔
