اسلام آباد. حکومت آزاد جموں و کشمیر کے وزیرِ چوہدری جاوید اقبال بدھنوی (خوراک، اے جے کے ٹی ای وی ٹی اے اور کوٹلی ڈویلپمنٹ اتھارٹی) نے اسلام آباد میں ترک تعاون و رابطہ ایجنسی (TIKA) کے دفتر کا دورہ کیا، جہاں ان کی ملاقات ٹیکا کی کنٹری ہیڈ سلیوا ٹونا سے ہوئی۔
ملاقات کے دوران سلیوا ٹونا نے آزاد کشمیر میں جاری ٹیکا کے ترقیاتی و فلاحی منصوبوں پر تفصیلی بریفنگ دی۔ فریقین کے درمیان مستقبل کے باہمی تعاون کے ممکنہ شعبوں خصوصاً فنی و پیشہ ورانہ تربیت، غذائی تحفظ اور علاقائی ترقی پر تبادلۂ خیال کیا گیا اور اس تعاون کو ٹھوس اور پائیدار اقدامات کے ذریعے آگے بڑھانے کے عزم کا اظہار کیا گیا۔اس موقع پر وزیرِ حکومت نے ترکیہ کی حکومت اور عوام کا کشمیر میں جاری فلاحی منصوبوں اور کشمیری عوام کی مسلسل معاونت پر شکریہ ادا کیا۔ انہوں نے کہا کہ ٹیکا کی کاوشیں آزاد کشمیر میں انسانی وسائل کی ترقی اور سماجی بہبود کے فروغ میں اہم کردار ادا کر رہی ہیں۔
