انٹرنیشنل کرکٹ کونسل (آئی سی سی) نے آئی سی سی مینز ٹی ٹوئنٹی ورلڈ کپ کے دسویں ایڈیشن کے لیے کمنٹری پینل کا اعلان کر دیا ہے، جس میں سابق عظیم کھلاڑیوں اور موجودہ کرکٹ اسٹارز کی نمایاں فہرست شامل ہے۔
ٹی ٹوئنٹی ورلڈ کپ کا آغاز 7 فروری سے بھارت اور سری لنکا میں ہوگا۔ اعلان کردہ کمنٹری پینل میں روی شاستری، ناصر حسین، ایان اسمتھ اور ایان بشپ جیسے عالمی شہرت یافتہ نام شامل ہیں۔
پاکستان کی نمائندگی چار معروف سابق کھلاڑی کریں گے جن میں وسیم اکرم، وقار یونس، بازید خان اور رمیز راجہ شامل ہیں۔
اس کے علاوہ ایرون فنچ، دنیش کارتک، کمار سنگاکارا، سیموئل بدری، رابن اتھپا اور کارلوس بریتھویٹ بھی کمنٹری کے فرائض انجام دیں گے۔
دلچسپ بات یہ ہے کہ جنوبی افریقہ کے موجودہ کھلاڑی اور آئی سی سی ورلڈ ٹیسٹ چیمپئن شپ جیتنے والے کپتان ٹیمبا باووما بھی کمنٹری پینل کا حصہ ہوں گے۔
اسی طرح 2014 کے ٹی ٹوئنٹی ورلڈ کپ کے فاتح سری لنکن کپتان اینجلو میتھیوز بھی کمنٹری ٹیم میں شامل ہیں۔ یہ دونوں پہلی بار کسی ٹی ٹوئنٹی ورلڈ کپ میں کمنٹری کریں گے۔
