اگر آپ موبائل پر براؤزر کو منی مائز کر کے یا اسکرین لاک کر کے یوٹیوب سنتے تھے تو اب یہ سہولت ختم ہو گئی ہے۔ گوگل نے تصدیق کر دی ہے کہ یوٹیوب پر بیک گراؤنڈ پلے بیک اب صرف پریمیئم صارفین کے لیے ہوگا، فری صارفین اس ٹرک سے مزید فائدہ نہیں اٹھا سکیں گے۔
یوٹیوب کے فری صارفین اب موبائل براؤزر پر ویڈیو کو بیک گراؤنڈ میں نہیں چلا سکیں گے۔ گوگل کے مطابق جب صارف ویڈیو چلتے ہوئے براؤزر کو منی مائز یا اسکرین لاک کرتا ہے تو آواز خود بخود بند ہو جاتی ہے۔
اس سے پہلے کئی صارفین Edge، Brave، Vivaldi اور Samsung Internet جیسے تھرڈ پارٹی براؤزرز کے ذریعے اس پابندی سے بچ نکلتے تھے اور بغیر پریمیئم سبسکرپشن کے آڈیو سنتے رہتے تھے۔ تاہم اب گوگل نے اس راستے کو بھی بند کر دیا ہے۔
میڈیا رپورٹس کے مطابق زیادہ تر شکایات Samsung Internet استعمال کرنے والے صارفین کی جانب سے سامنے آئی ہیں، تاہم دیگر براؤزرز پر بھی یہی مسئلہ دیکھا جا رہا ہے۔ بعض صارفین نے بتایا کہ ویڈیو بند ہونے سے پہلے اسکرین پر ایک مختصر نوٹیفکیشن بھی نظر آتا ہے، جس کے بعد میڈیا کنٹرولز غائب ہو جاتے ہیں۔
گوگل کے ترجمان کا کہنا ہے کہ بیک گراؤنڈ پلے بیک یوٹیوب پریمیئم کی خصوصی سہولت ہے، اور اگر ماضی میں کچھ فری صارفین کو یہ سہولت مل رہی تھی تو اب تمام پلیٹ فارمز پر یکساں پالیسی نافذ کر دی گئی ہے۔
فری صارفین کا کہنا ہے کہ براؤزر کیش کلیئر کرنا یا پکچر اِن پکچر سیٹنگ تبدیل کرنا بھی اب کسی کام نہیں آ رہا۔ بعض رپورٹس میں یہ بھی کہا گیا ہے کہ کچھ معاملات میں پریمیئم صارفین کو بھی تھرڈ پارٹی براؤزرز پر بیک گراؤنڈ پلے بیک کا مسئلہ پیش آ رہا ہے۔
واضح رہے کہ یوٹیوب پریمیئم صارفین کو بیک گراؤنڈ پلے بیک، آف لائن ویڈیو ڈاؤن لوڈ، ویڈیوز کی قطار بنانے اور بہتر ویڈیو کوالٹی جیسی سہولیات فراہم کی جاتی ہیں۔
