پاکستان اسپورٹس بورڈ نے بھارت میں منعقدہ ساؤتھ ایشین جونیر ایتھلیٹکس چیمپین شپ میں اجازت کے بغیر دورے کا نوٹس لیتے ہوئے ایتھلیٹکس فیڈریشن آف پاکستان سے جواب طلب کرلیا۔
بھارت کی جنوبی ریاست تامل ناڈو کے دارالحکومت چنئی (مدراس) میں منعقدہ انٹرنیشنل ایونٹ میں بارہ کھلاڑیوں اور چار آفیشلز پر مشتمل ٹیم نے شرکت کی تھی۔ پاکستان اس ایونٹ کے 90 میں سے ایک بھی میڈل حاصل کرنے میں ناکام رہا تھا۔
ایتھلیٹکس فیڈریشن نے بھارت جیسے ملک کا دورہ کرنے کی اجازت کیلٸے این او سی بھی نہیں لیا جس پر پاکستان اسپورٹس بورڈ نے بغیر این او سی کے ٹیم کے دورہ بھارت پر ایتھلیٹکس فیڈریشن سے پوچھ گچھ شروع کردی ہے۔
پاکستان اسپورٹس بورڈ نے ایتھلیٹکس فیڈریشن کے سیکرٹری شاہ جہاں میر کو بھیجے گئے خط میں واضح کیا کہ جونیر ایتھلیٹکس چیمپین شپ کے لیے ٹیم کے بھارت جانے کے لیے کوئی این او سی نہیں لیا گیا جو پی ایس بی کے آٸین کے آرٹیکل 7 کی ذیلی ذیلی دفعہ کی صریح خلاف ورزی ہے۔
خط میں کہا گیا کہ فیڈریشن نے حکومت سے لازمی این او سی حاصل کیے بغیر کھیلوں کے بین الاقوامی ایونٹ میں دستہ بھارت بھیجا جس پر ایتھلیٹکس فیڈریشن اپنا تحریری جواب جمع کرائے۔
یہ بات قابل ذکر ہے کہ جب ہندوستان میں کھیلوں کے کسی بھی مقابلے میں حصہ لینے کی بات آتی ہے تو اس کے قوانین اور بھی سخت ہوتے ہیں۔ متعلقہ فیڈریشن کو اس طرح کا دورہ کرنے سے پہلے خفیہ ایجنسیوں اور متعلقہ وزارتوں سے این او سی لینا پڑتا ہے۔
