معروف بالی ووڈ اداکار رنویر سنگھ اور اکشے کھنہ کی فلم دھرندھر نے باکس آفس پر دھوم مچا دی ہے اور ریکارڈ توڑ بزنس کیا ہے۔ آدتیہ دھر کی ہدایت کاری میں بننے والی یہ فلم تاریخ رقم کر رہی ہے اور اب جلد ہی ڈیجیٹل اسٹریمنگ پر دستیاب ہوگی۔
انٹرٹینمنٹ بزنس ٹریکنگ پورٹل Sacnilk کی رپورٹ کے مطابق، دھرندھر 30 جنوری سے نیٹ فلکس پر پریمیئر ہوگی۔ اس سلسلے میں نیٹ فلکس کی جانب سے ابھی تک سرکاری اعلان نہیں کیا گیا تاہم توقع ہے کہ آنے والے دنوں میں آفیشل اپڈیٹ جاری ہوگی۔
نیٹ فلکس نے دھرندھدر اور آئندہ آنے والی دھرندھر 2: دی ریونج کے او ٹی ٹی حقوق ایک مشترکہ ڈیل میں 130 کروڑ روپے میں خریدے ہیں جو رنویر سنگھ کے لیے ڈیجیٹل اسپیس میں نیا ریکارڈ ہے۔
Sacnilk کے مطابق، 45 دنوں میں دھرندھر نے بھارت میں 826.50 کروڑ روپے کی خالص آمدنی حاصل کی جبکہ عالمی سطح پر فلم نے 1284 کروڑ روپے سے زائد کا بزنس کیا۔ توقع ہے کہ یہ رقم 1300 کروڑ روپے کا ہندسہ عبور کر جائے گی اس سے قبل کہ فلم نیٹ فلکس پر دستیاب ہو۔
