وفاقی وزیر داخلہ محسن نقوی نے نواب شاہ کا دورہ کرکے صدر مملکت آصف علی زرداری کو اہم پیغام پنچا دیا ہے۔
میڈیا رپورٹس کے مطابق جمعرات کے روز محسن نقوی نے اچانک نواب شاہ کا دورہ کیا اور صدر مملکت آصف علی زرداری سے زرداری ہاؤس میں تقریباً ایک گھنٹے طویل ملاقات کی، جس میں نئے صوبوں کی تشکیل، اس معاملے پر ممکنہ ریفرنڈم اور جمعیت علمائے اسلام (ف) کے خلاف ممکنہ کارروائی سمیت اہم سیاسی امور پر تبادلہ خیال کیا گیا۔
محسن نقوی فوری طور پر ایک اہم قومی شخصیت کا پیغام لے کر نواب شاہ پہنچے تھے اور زیرِ بحث معاملات پر صدر آصف علی زرداری کو اعتماد میں لیا۔
صدر آصف علی زرداری سے وزیرداخلہ محسن نقوی کی نواب شاہ میں ملاقات، مستقبل کے سیاسی منظرنامہ پر بات چیت https://t.co/eij1Yo4i97
— Khabarwalay (@_khabarwalay) November 12, 2026
محسن نقوی اسلام آباد سے خصوصی طیارے کے ذریعے نواب شاہ ایئرپورٹ پہنچے، جہاں سندھ کے وزیر داخلہ ضیا الحسن لنجار، وزیر برائے ورکس اینڈ سروسز و جیل خانہ جات حاجی علی حسن زرداری، ڈپٹی کمشنر عبدالصمد نظامانی اور ایس ایس پی ڈاکٹر سمیر نور چنا نے ان کا استقبال کیا۔
وفاقی وزیر داخلہ کو سخت سیکیورٹی میں زرداری ہاؤس پہنچایا گیا، جہاں ان کی صدر مملکت سے ملاقات تقریباً 59 منٹ جاری رہی۔ ملاقات کے بعد محسن نقوی خصوصی طیارے کے ذریعے واپس اسلام آباد روانہ ہوگئے۔
آصف زرداری سے ملاقات کے لئے محسن نقوی نوابشاہ پہنچ گئے https://t.co/QGD5ccpRGP
— Ahmed Saeed (@Ahmed_SaeedPTI) November 12, 2026
رپورٹ کے مطابق دورے کے مبینہ ایجنڈے اور اہم سیاسی شخصیات کی شمولیت کے باعث سیاسی حلقوں میں اس ملاقات کو خاصی اہمیت دی جا رہی ہے، تاہم ملاقات یا صدر زرداری کو پہنچائے گئے پیغام کے حوالے سے تاحال کوئی سرکاری بیان جاری نہیں کیا گیا۔
