دنیا کے خاتمے سے متعلق دعوے ایک بار پھر سوشل میڈیا پر گردش کر رہے ہیں۔ اس بار ان دعوؤں میں 13 نومبر 2026 کی تاریخ سامنے آئی ہے، جس کے بارے میں کہا جا رہا ہے کہ اس روز دنیا ختم ہو سکتی ہے۔ لیکن اس دعوے کے پیچھے ایک 66 سال پرانی سائنسی تحقیق ہے، جسے وقت گزرنے کے ساتھ مختلف انداز میں پیش کیا جاتا رہا ہے۔
بی بی سی کی ایک رپورٹ کے مطابق اس کہانی کا آغاز 1960 سے ہوتا ہے، جب امریکی سائنسی جریدے ’سائنس‘ میں تین محققین ہائنس فان فورسٹر، پیٹریشیا مورا اور لارنس ایمیاٹ کی ایک تحقیق شائع ہوئی۔ اس کا عنوان تھا ’ڈومز ڈے: جمعہ 13 نومبر 2026‘۔
محققین نے اس تحقیق میں دنیا کی آبادی کے پرانے اعداد و شمار کا جائزہ لیا اور یہ جاننے کی کوشش کی کہ مستقبل میں انسانی آبادی کس رفتار سے بڑھ سکتی ہے۔
ان کے بنائے گئے ریاضیاتی ماڈل کے مطابق اگر آبادی اسی رفتار سے بڑھتی رہی اور اس کی رفتار مزید تیز ہوتی گئی تو نومبر 2026 میں اس کی تعداد ایک ایسے مقام پر پہنچ سکتی تھی جسے ریاضی میں ’لامحدود‘ کہا جاتا ہے۔
سادہ الفاظ میں اس کا مطلب یہ تھا کہ اگر آبادی بڑھنے کا پرانا رجحان کبھی نہ بدلے تو حساب کے مطابق ایک وقت ایسا آئے گا جب اس کی تعداد کا اندازہ لگانا ممکن نہیں رہے گا۔ تاہم یہ ایک فرضی حسابی نتیجہ تھا، حقیقی دنیا میں ایسا ہونا ممکن نہیں۔
محققین نے خود بھی تسلیم کیا تھا کہ آبادی میں اضافہ صرف ماضی کے رجحان پر منحصر نہیں ہوتا بلکہ خوراک، پانی، بیماریوں، قدرتی وسائل اور شرحِ پیدائش جیسے عوامل بھی اس پر اثر انداز ہوتے ہیں۔
پرانی پیش گوئی دوبارہ کیوں زیرِ بحث آئی؟
اس تاریخ کا دوبارہ چرچا ہونے کی ایک وجہ مصر کے اخبار ’وطنی‘ کی جانب سے 1964 کا ایک پرانا مضمون دوبارہ شائع کرنا ہے۔ اس مضمون پر مصری صحافی مشیل تکلا کا نام درج ہے اور اس میں بھی 13 نومبر 2026 کو دنیا کے خاتمے کا ذکر کیا گیا تھا۔
بعد ازاں بعض میڈیا اداروں اور سوشل میڈیا صارفین نے اس مضمون کو شیئر کیا، جس سے یہ پرانی پیش گوئی دوبارہ خبروں میں آگئی۔
تاہم 1960 کی اصل سائنسی تحقیق اور مشیل تکلا کے مضمون کو ایک ہی چیز سمجھنا درست نہیں۔ دونوں کے درمیان براہِ راست تعلق ثابت کرنے کے لیے تکلا کے اصل مضمون کا مکمل متن اور اس کے دلائل سامنے ہونا ضروری ہے۔
سوشل میڈیا پر اس تاریخ کو شمسی سرگرمیوں اور ممکنہ قدرتی آفات سے بھی جوڑا جا رہا ہے۔ اس حوالے سے یہ سمجھنا ضروری ہے کہ سورج میں سرگرمیاں ایک قدرتی عمل ہیں، جو تقریباً ہر 11 سال بعد اپنے عروج پر پہنچتی ہیں۔
ان سرگرمیوں کے دوران سورج سے شدید توانائی اور چارج شدہ ذرات خارج ہو سکتے ہیں، جنہیں شمسی طوفان کہا جاتا ہے۔ شدید شمسی طوفان زمین کے مقناطیسی میدان کو متاثر کر سکتے ہیں، جس سے سیٹلائٹس، جی پی ایس، مواصلاتی نظام اور بجلی کی ترسیل میں خلل پڑ سکتا ہے، تاہم اس کا مطلب یہ نہیں کہ زمین تباہ ہو سکتی ہے یا انسانی زندگی ختم ہو جائے گی۔
ماہرِ فلکیات عماد مجاہد نے بی بی سی نیوز عربی سے گفتگو میں کہا کہ 2026 میں شمسی سرگرمیوں کا عروج کوئی غیر معمولی بات نہیں بلکہ قدرتی شمسی چکر کا حصہ ہے۔
ان کے مطابق 13 نومبر 2026 کو ایسا کوئی معلوم فلکیاتی واقعہ متوقع نہیں جس سے زمین کی سلامتی کو خطرہ لاحق ہو۔ دنیا کے خاتمے سے متعلق دعوؤں کی بھی کوئی سائنسی بنیاد موجود نہیں۔
1960 کی پیش گوئی درست کیوں نہیں ہوئی؟
اس پرانی تحقیق میں محققین نے یہ فرض کیا تھا کہ دنیا کی آبادی ماضی کی طرح مسلسل تیزی سے بڑھتی رہے گی، لیکن وقت کے ساتھ حالات بدل گئے۔
1960 میں دنیا کی آبادی تقریباً تین ارب تھی، جو اب آٹھ ارب سے تجاوز کر چکی ہے۔ تاہم آبادی بڑھنے کی رفتار میں نمایاں کمی آئی ہے، کیونکہ دنیا کے کئی ممالک میں شرحِ پیدائش کم ہو رہی ہے۔
اقوام متحدہ کی 2024 کی رپورٹ کے مطابق دنیا کی آبادی 2024 کے تقریباً 8.2 ارب سے بڑھ کر 2080 کی دہائی کے وسط تک 10.3 ارب کے قریب پہنچ سکتی ہے۔ اس کے بعد آبادی میں کمی کا امکان ظاہر کیا گیا ہے۔
یہ اعداد و شمار واضح کرتے ہیں کہ 1960 میں تیار کیا گیا ریاضیاتی ماڈل مستقبل میں آبادی کے حقیقی رجحانات کی درست عکاسی نہیں کر سکا۔
یوں 13 نومبر 2026 کی تاریخ دنیا کے خاتمے کی پیش گوئی نہیں بلکہ ایک پرانے ریاضیاتی حساب کا نتیجہ ہے۔ اصل تحقیق میں نہ کسی قدرتی آفت کا ذکر تھا، نہ شمسی طوفان کا اور نہ ہی نسلِ انسانی کے خاتمے کی کوئی تاریخ مقرر کی گئی تھی، اس لیے اس تحقیق کو دنیا کے خاتمے کی سائنسی پیش گوئی قرار دینا درست نہیں۔
