ایرانی صدر مسعود پزشکیان اور امریکی صدر ڈونلڈ ٹرمپ نے دونوں ممالک کے درمیان جاری کشیدگی اور تنازع کو مذاکرات کے ذریعے حل کرنے کے لیے آمادگی کا اظہار کیا ہے۔
تہران میں گفتگو کرتے ہوئے ایرانی صدر مسعود پزشکیان نے واضح کیا کہ ان کا ملک امریکا کے ساتھ کسی بھی جنگ کے بجائے تنازع کا سفارتی اور مذاکراتی حل چاہتا ہے۔
ان کا کہنا تھا کہ وہ بات چیت اور مذاکرات پر یقین رکھنے والے لوگ ہیں، تاہم ایران کسی بھی طاقت کے استعمال یا دھونس کے آگے ہرگز ہتھیار نہیں ڈالے گا۔
اُدھر امریکی صدر ڈونلڈ ٹرمپ نے واشنگٹن میں صحافیوں سے گفتگو کرتے ہوئے ایران کے خلاف جنگ کو مزید نہ بڑھانے کا اشارہ دیا ہے۔
امریکی صدر کا کہنا تھا کہ ایران کے خلاف فی الحال مزید فوجی کارروائی ضروری محسوس نہیں ہوتی اور وہ امید کرتے ہیں کہ دونوں ممالک کے درمیان تنازع جلد ختم ہو جائے گا۔
تاہم صدر ٹرمپ نے یہ بھی واضح کیا کہ اگر حالات تبدیل ہوتے ہیں تو امریکا کسی بھی متوقع کارروائی کے لیے پوری طرح تیار ہے۔
امریکی صدر ڈونلڈ ٹرمپ نے الیکشن کے تناظر میں گفتگو کرتے ہوئے اعتراف کیا کہ ایران کے خلاف جنگ نے امریکا کو مالی اور سیاسی طور پر نقصان پہنچایا ہے، اور یہ مسئلہ انتخابات میں ان کی جماعت کی ناکامی کی اہم وجہ بنا۔
اس موقع پر انہوں نے انتخابی عمل میں استعمال ہونے والی ووٹنگ مشینوں پر سوالات اٹھاتے ہوئے الیکشن کی شفافیت پر شکوک و شبہات کا اظہار بھی کیا۔
اس کے علاوہ امریکی صدر نے دفاعی امور سے متعلق بات کرتے ہوئے کہا کہ اگر پیٹ ہیگستھ کا مواخذہ کیا گیا تو وہ ان کا پورا ساتھ دیں گے۔
