جاپان کے دارالحکومت ٹوکیو میں ایک لگژری گھڑی کی چوری کا انوکھا واقعہ پیش آیا ہے، جہاں ایک شخص دکان سے تقریباً 2 لاکھ 90 ہزار ڈالر مالیت کی سوئس گھڑی لے کر فرار ہوگیا، تاہم چند روز بعد وہی گھڑی ایک پارسل کے ذریعے معافی نامے کے ساتھ واپس پہنچا دی گئی۔
غیر ملکی خبر رساں ادارے اے ایف پی کے مطابق جب ایک شخص گاہک بن کر گھڑیوں کی دکان میں داخل ہوا۔ اس نے وہاں موجود سوئس لگژری برانڈ ”آڈیمار پیگے“ کی قیمتی گھڑی دیکھنے کی خواہش ظاہر کی اور اسے اپنی کلائی پر پہن کر آزمانے لگا۔
گھڑی پہننے کے بعد اس شخص نے اسے اتارنے کے بجائے دکان سے باہر دوڑ لگا دی اور فرار ہوگیا۔ واقعے کے وقت دکان میں دو ملازمین موجود تھے، تاہم خوش قسمتی سے کسی کو کوئی نقصان نہیں پہنچا اور یوں تقریباً 2 لاکھ 90 ہزار ڈالر مالیت کی گھڑی چوری ہوگئی۔ پاکستانی کرنسی میں اس کی قیمت تقریباً 8 کروڑوں 2 لاکھ روپے بنتی ہے۔
واقعے کے بعد ایک نیا موڑ اس وقت آیا جب چوری کے چند روز بعد دکان کو ایک کوریئر سروس کے ذریعے پارسل موصول ہوا، جو جاپان کے صوبے آئچی سے بھیجا گیا تھا۔ پارسل میں چوری ہونے والی گھڑی کے ساتھ ایک مختصر معافی نامہ بھی رکھا گیا تھا، جس میں صرف ’’سوری‘‘ یعنی معذرت کے الفاظ درج تھے۔
جاپانی اخبار اساہی شمبن اور مقامی میڈیا نے نام ظاہر نہ کرنے والے تفتیشی ذرائع کے حوالے سے بتایا کہ گھڑی کے سیریل نمبر سے اس بات کی تصدیق ہوئی کہ یہ وہی گھڑی ہے جو دکان سے چوری ہوئی تھی۔
دکان کی انتظامیہ نے اے ایف پی سے رابطے پر اس واقعے کے حوالے سے تبصرہ کرنے سے گریز کیا، جبکہ ٹوکیو پولیس تاحال مشتبہ شخص کی تلاش میں ہے اور اسے چوری کے الزام میں تلاش کیا جا رہا ہے۔
واضح رہے کہ اسی شاپنگ کمپلیکس میں اس سے قبل اگست کے مہینے میں بھی چوری کا ایک بڑا واقعہ پیش آیا تھا، جب ایک دوسری دکان سے مجموعی طور پر 20 کروڑ ین مالیت کی چار لگژری گھڑیاں چوری ہوگئی تھیں، جن کی قیمت تقریباً 13 لاکھ ڈالر بتائی گئی تھی۔
