ترکیہ کے وزیر خارجہ حاقان فیدان نے کہا ہے کہ مکہ دفاعی اتحاد کے خلاف بھارتی ذرائع ابلاغ کی مہم اس اتحاد سے متعلق نئی دہلی کے خدشات کی عکاسی کرتی ہے۔ ترک ٹی وی چینل این ٹی وی کو انٹرویو دیتے ہوئے ان کا کہنا تھا کہ پاکستان، ترکیہ اور سعودی عرب کے درمیان اسٹریٹجک تعاون کے بڑھتے ہوئے امکانات نے بھارت کو بے چین کردیا ہے۔

اس حوالے سے جاری بیان میں کہا گیا ہے کہ بھارت مکہ دفاعی اتحاد کو تنقید اور غلط معلومات کے ذریعے کمزور نہیں کرسکتا۔ بیان کے مطابق پاکستان، ترکیہ اور سعودی عرب کے درمیان تعاون ایک اہم اسٹریٹجک پیشرفت ہے، جس کے اثرات وقت کے ساتھ سامنے آئیں گے۔ اس میں مزید کہا گیا ہے کہ بھارت اس اتحاد پر تنقید تو کرسکتا ہے، لیکن اس کی اسٹریٹجک اہمیت کو نظرانداز نہیں کرسکتا۔