فولڈنگ اسمارٹ فونز کی مارکیٹ میں ایپل کی آمد کو اہم پیش رفت قرار دیا جا رہا ہے، تاہم پہلے ہی ہفتے میں اس کے نئے آئی فون کو اسکرین کے مسائل کا سامنا کرنا پڑا ہے۔ کمپنی نے خرابی کی تصدیق کرتے ہوئے متاثرہ فونز تبدیل کرنے کی پیشکش کی ہے۔
برطانوی خبر رساں ادارے رائٹرز کے مطابق ایپل نے پیر 26 اکتوبر کو کہا ہے کہ اس کے نئے فولڈنگ فون ’آئی فون ڈؤو‘ کے محدود تعداد میں یونٹس کی اندرونی اسکرین میں خرابی سامنے آئی ہے۔ کمپنی نے متاثرہ صارفین کو ایپل کیئر سے رابطہ کرکے فون تبدیل کروانے کی ہدایت کی ہے۔
ایپل نے گزشتہ ہفتے آئی فون ڈؤو کی ترسیل شروع کی تھی۔ اس فون کی ابتدائی آن لائن فروخت کے آرڈرز چند منٹوں میں مکمل ہوگئے تھے، جبکہ دنیا کے مختلف حصوں میں صارفین اسے خریدنے کے لیے قطاروں میں کھڑے دکھائی دیے۔ تجزیہ کاروں کا کہنا ہے کہ اس فون کی تیاری پیچیدہ ہونے کے باعث کمپنی کو طلب پوری کرنے میں مشکلات پیش آسکتی ہیں۔
ہفتے اور اتوار کے دوران سوشل میڈیا پر ایسی تصاویر اور پوسٹس سامنے آئیں جن میں آئی فون ڈؤو کی اندرونی اسکرین پر دراڑیں اور لکیریں دکھائی گئیں۔ یہ خرابیاں خاص طور پر اس مرکزی حصے کے قریب نظر آئیں جہاں سے فون تہہ ہوتا ہے۔
ایپل نے اپنے بیان میں کہا، ’’ہمیں معلوم ہے کہ آئی فون ڈؤو کے محدود تعداد میں یونٹس کی اندرونی اسکرین متاثر ہوئی ہے۔ اگر صارفین کو اپنے آئی فون ڈؤو کی اسکرین میں کوئی مسئلہ پیش آئے تو وہ متبادل فون کے لیے ایپل کیئر سے رابطہ کرکے اسے تبدیل کرواسکتے ہیں۔‘‘
کمپنی نے تاحال یہ واضح نہیں کیا کہ اسکرین میں خرابی کی اصل وجہ کیا ہے۔
الیکٹرانک آلات کو کھول کر ان کے اندرونی حصوں کا جائزہ لینے اور مرمت سے متعلق رہنمائی فراہم کرنے والی کمپنی آئی فکس اِٹ نے بھی اس معاملے کا تجزیہ کیا ہے۔ کمپنی کے مطابق اس نے فون کو کھولنے کی ویڈیوز، پیٹنٹس اور سی ٹی اسکینز کی مدد سے آئی فون ڈؤو کے قبضے (ہنج) کا سہ جہتی ماڈل تیار کیا اور اس کا موازنہ رپورٹ ہونے والی خرابیوں کے مقامات سے کیا۔
آئی فکس اِٹ کے تجزیے میں سامنے آیا کہ رپورٹ ہونے والی خرابیاں اس مقام کے قریب جمع تھیں جہاں اسکرین کے نیچے سے ایک ڈسپلے کیبل گزرتی ہے اور اس کے قریب ایک مرکزی سپورٹ بار موجود ہے۔ کمپنی کے مطابق ممکن ہے کہ فون کو تہہ کرتے وقت یہ بار اسکرین کے راستے سے مناسب طور پر نہ ہٹتا ہو، جس سے ایک چھوٹے حصے پر دباؤ بڑھ جاتا ہو اور وہاں اسکرین ٹوٹنے کا خطرہ پیدا ہوتا ہو۔
تاہم، یہ آئی فکس اِٹ کی جانب سے پیش کیا گیا ممکنہ سبب ہے، ایپل نے اس کی تصدیق نہیں کی۔ کمپنی نے اس تجزیے پر فوری طور پر کوئی تبصرہ بھی نہیں کیا۔
دلچسپ بات یہ ہے کہ آئی فکس اِٹ نے اپنے جائزے میں آئی فون ڈؤو کو اب تک آزمائے گئے فولڈنگ فونز میں سب سے زیادہ قابلِ مرمت فون بھی قرار دیا ہے۔
مارکیٹ ریسرچ ادارے آئی ڈی سی کے نائب صدر فرانسسکو جیرونیمو نے ایپل کی جانب سے فوری طور پر فون تبدیل کرنے کی پیشکش کو مسئلے سے نمٹنے کے لیے درست ابتدائی قدم قرار دیا۔
ان کا کہنا تھا کہ سام سنگ کو بھی 2019 میں اپنے پہلے گلیکسی فولڈ کے ساتھ مسائل کا سامنا کرنا پڑا تھا، تاہم اس تجربے نے یہ بھی ظاہر کیا کہ فوری اور شفاف ردعمل کے ذریعے کسی نئی مصنوعات کے شعبے کو پہنچنے والے نقصان کو محدود کیا جاسکتا ہے۔
آئی فون ڈؤو کی اسکرین میں سامنے آنے والی خرابی ایپل کے لیے ابتدائی مرحلے میں ایک اہم امتحان ہے، کیونکہ فولڈنگ فون کی مارکیٹ میں کامیابی کا انحصار صرف نئے ڈیزائن پر نہیں بلکہ اس کی پائیداری اور صارفین کے اعتماد پر بھی ہے۔ فی الحال کمپنی نے متاثرہ فونز تبدیل کرنے کا اعلان کیا ہے، جبکہ خرابی کی اصل وجہ سامنے آنا باقی ہے۔
