مائیکروسافٹ نے مصنوعی ذہانت پر بڑھتے ہوئے اخراجات کے پیشِ نظر لاگت کم کرنے کے لیے قریباً 60 ہزار ملازمین کو رضاکارانہ طور پر ملازمت چھوڑنے کے پیکیج دینے کا اعلان کیا ہے۔
کمپنی کے مطابق اس پروگرام سے امریکا، برطانیہ، کینیڈا اور بھارت میں منتخب شعبوں کے ملازمین مستفید ہو سکیں گے۔ اس میں نائب صدر کی سطح اور اس سے نچلے عہدوں پر کام کرنے والے اہل ملازمین شامل ہیں، تاہم ڈیٹا سینٹرز، فروخت اور مارکیٹنگ سمیت بعض شعبوں کے ملازمین اس سہولت سے مستثنیٰ ہوں گے۔
مائیکروسافٹ کی چیف پیپل آفیسر ایمی کولمین کے مطابق رضاکارانہ علیحدگی کا یہ پروگرام ملازمین کو مالی معاونت اور کیریئر کی منصوبہ بندی میں مدد فراہم کرے گا۔ یہ پیش کش محدود مدت کے لیے ہوگی اور اس کا اطلاق منتخب ادارہ جاتی شعبوں پر ہوگا۔
مائیکروسافٹ کے جون 2026 کے اختتام پر دنیا بھر میں قریباً 2 لاکھ 23 ہزار ملازمین تھے، اس طرح نئے پروگرام کے لیے اہل افراد کی تعداد عالمی افرادی قوت کے قریباً 27 فیصد کے برابر ہے۔
یہ رواں سال مائیکروسافٹ کا دوسرا رضاکارانہ علیحدگی یا قبل از وقت ریٹائرمنٹ پروگرام ہے۔ اس سے قبل اپریل میں بھی امریکا میں بعض ملازمین کو قبل از وقت ریٹائرمنٹ کی پیش کش کی گئی تھی۔ جولائی میں کمپنی نے قریباً 5 ہزار ملازمتیں بھی ختم کی تھیں، جن میں گیمنگ ڈویژن ایکس باکس زیادہ متاثر ہوا تھا۔
دنیا کی بڑی ٹیکنالوجی کمپنیاں مصنوعی ذہانت، ڈیٹا سینٹرز اور جدید کمپیوٹنگ نظاموں پر بھاری سرمایہ کاری کر رہی ہیں۔ مائیکروسافٹ کی جانب سے اخراجات میں کمی اور افرادی قوت کی تنظیمِ نو کا تازہ اقدام بھی اسی بدلتی ہوئی ٹیکنالوجی صنعت کے تناظر میں سامنے آیا ہے۔
