سعودی عرب میں حوثیوں کے حملوں کے نتیجے میں 3 افراد جاں بحق اور 10 زخمی ہوگئے ہیں، جبکہ آرامکو کے شیبہ آئل فیلڈ اور دمام کے کنگ فہد انٹرنیشنل ایئرپورٹ کو نشانہ بنانے کی اطلاعات ہیں۔
سعودی وزارت توانائی اور سعودی پریس ایجنسی کے مطابق بدھ کی صبح سعودی عرب کے مشرقی علاقے میں واقع آرامکو کے شیبہ آئل فیلڈ کی ایک تنصیب کو نشانہ بنانے کی کوشش کرنے والے ڈرون کو فضائی دفاعی نظام نے فضا میں ہی تباہ کردیا، جس کے بعد اس کا ملبہ گرنے سے 2 غیر ملکی شہری جاں بحق ہوگئے۔
حکام کے مطابق جاں بحق ہونے والوں میں ایک فلپائنی اور ایک نیپالی شہری شامل ہیں، جبکہ ایک پاکستانی اور ایک بھارتی شہری زخمی ہوئے۔
ڈرون کا ملبہ گرنے کے باعث آئل فیلڈ کے باہر کھڑی ایک گاڑی میں آگ لگ گئی اور وہ جل کر تباہ ہوگئی، تاہم تیل کی پیداوار متاثر نہیں ہوئی۔
دوسری جانب دمام کے کنگ فہد انٹرنیشنل ایئرپورٹ پر حملے میں ایک شخص جاں بحق اور 8 افراد زخمی ہوگئے۔
سعودی حکام کے مطابق حملوں کے نتیجے میں ہونے والے مالی نقصان کا تخمینہ لگایا جا رہا ہے۔
