کابینہ نے سندھ کے پراپرٹی ٹیکس نظام میں اصلاحات کے لیے عالمی بینک کے تعاون سے 150 ملین ڈالر کے پروگرام کی منظوری دے دی جس کا مقصد ریونیو اکٹھا کرنے کو بہتر بنانا اور مقامی حکومتی اداروں کے مالی انتظام کو مضبوط کرنا ہے۔
سندھ پراپرٹی ریونیو اینہانسمنٹ پروگرام کے تحت، حکومت نے کراچی کی 25 ٹاؤن میونسپل کارپوریشنز میں پراپرٹی ٹیکس کی وصولی کو 2.3 ارب روپے سے بڑھا کر 25.5 ارب روپے کرنے کا ہدف مقرر کیا ہے۔
کابینہ کو دی گئی بریفنگ کے مطابق، عالمی بینک پروگرام برائے نتائج کے جزو کے لیے 110 ملین ڈالر اور سرمایہ کاری کے منصوبوں کے لیے 40 ملین ڈالر فراہم کرے گا۔
سندھ حکومت پروگرام برائے نتائج سے منسلک رقم کے 20 فیصد کے اضافی حصے کے طور پر اپنا حصہ ڈالے گی۔
اس پروگرام میں دیگر شہری مقامی کونسلوں میں پراپرٹی ٹیکس وصولی کو جدید بنانے اور 45 منتخب مقامی کونسلوں کی ادارہ جاتی صلاحیت کو مضبوط بنانے کا بھی تصور پیش کیا گیا ہے۔
انٹیگریٹڈ فنانشل مینجمنٹ انفارمیشن سسٹم متعارف کرانے کی بھی منظوری
اس کے ساتھ ہی کابینہ نے مقامی حکومتی اداروں میں مالی انتظام اور انتظامی کارکردگی کو بہتر بنانے کے لیے انٹیگریٹڈ فنانشل مینجمنٹ انفارمیشن سسٹم متعارف کرانے کی بھی منظوری دی۔
اس پیکج میں فنانسنگ اور عمل درآمد کے معاہدے نتائج کی جانچ کا فریم ورک، تصدیقی طریقہ کار اور ماحولیاتی و سماجی تحفظات شامل ہیں۔ وزیر اعلیٰ کے ترجمان کے مطابق اسے کابینہ میں بعد از منظوری کے لیے پیش کیا گیا تھا۔
عالمی بینک کا بورڈ 30 اکتوبر کو اس پروگرام پیکج پر غور کرے گا۔
