بالی ووڈ اداکار ٹائیگر شروف پر قاتلانہ حملے میں ملوث ملزمان کی پہلی تصویر سامنے آ گئی ہے، جبکہ ممبئی پولیس نے حملے میں استعمال کی جانے والی موٹر سائیکل بھی برآمد کر لی ہے۔
ممبئی کے علاقے جوہو میں اتوار کی شام پیش آنے والے اس واقعے کے بعد پولیس اور کرائم برانچ کی متعدد ٹیمیں ملزمان کی تلاش اور ان کے متحرک نیٹ ورک کو بے نقاب کرنے میں مصروف ہیں۔
یہ واقعہ اس وقت پیش آیا جب ٹائیگر شروف فٹ بال میچ کھیلنے کے بعد واپس روانہ ہو رہے تھے۔
پولیس ذرائع کے مطابق فائرنگ کے وقت 36 سالہ اداکار بالکل محفوظ رہے، تاہم گاڑی شفٹ کرنے کے دوران ان کے ہاتھ پر بارود سے معمولی جلنے کا نشان آیا ہے جبکہ ان کا ڈرائیور فردوس اور ایک آٹو رکشہ ڈرائیور چوہان فائرنگ کی زد میں آ کر زخمی ہو گئے۔
موقعِ واردات کے قریب سے حاصل کی جانے والی تصاویر اور سی سی ٹی وی فوٹیج میں دو اہم ملزمان کو سفید شرٹس میں دیکھا جا سکتا ہے، جن میں سے ایک نے سیاہ رنگ کی کیپ پہن رکھی ہے۔
پولیس حکام اور سیکیورٹی کیمروں کی ریکارڈنگ کے مطابق واقعے میں کل تین افراد ملوث تھے، جن میں سے دو نے گولیاں چلائیں جبکہ تیسرا ملزم موٹر سائیکل اسٹارٹ کیے ان کا انتظار کر رہا تھا۔
فائرنگ کے بعد تینوں ملزمان ایک ہی موٹر سائیکل پر سوار ہو کر فرار ہو گئے۔
بعد ازاں پولیس نے اندھیری ریلوے اسٹیشن سے وہ موٹر سائیکل برآمد کر لی جسے ملزمان فرار ہوتے وقت چھوڑ گئے تھے۔
پولیس اب گاڑی کے انجن اور چیسس نمبرز کے ذریعے اس کے مالک اور ریکارڈ کی چھان بین کر رہی ہے۔
واقعے کی ذمہ داری لانس بشنوئی گینگ نے قبول کی ہے اور بالی ووڈ اداکار سلمان خان کے ساتھ کام کرنے والی شخصیات کو بھی نئی دھمکیاں دی ہیں۔
ممبئی کی لوکل پولیس اور کرائم برانچ کی 15 مختلف ٹیمیں ملزمان کی گرفتاری کے لیے چھاپے مار رہی ہیں جبکہ فارنزک ماہرین نے موقع سے گولیوں کے خول اور دیگر شواہد جمع کر لیے ہیں تاکہ فائر کیے جانے والے راؤنڈز کی درست تعداد کا تعوار کیا جا سکے۔
مہاراشترا کے وزیراعلیٰ دیویندر فاڑنویس نے ممبئی کے پولیس کمشنر دیویندر بھارتی اور اداکار ٹائیگر شروف سے رابطہ کر کے تحقیقات جلد از جلد مکمل کرنے کی ہدایت دی ہے، جبکہ نائب وزیراعلیٰ ایکناتھ شندے نے بھی اداکار سے ان کی رہائش گاہ پر ملاقات کی۔
ایکناتھ شندے نے اس واقعے کو انتہائی تشویش ناک قرار دیتے ہوئے عزم ظاہر کیا کہ ممبئی میں گینگ وار یا کسی بھی قسم کی غنڈہ گردی کو دوبارہ سر اٹھانے نہیں دیا جائے گا اور اس حملے میں ملوث عناصر کے خلاف سخت ترین قانونی کارروائی کی جائے گی۔
