گوگل ڈیپ مائنڈ کے چیف ایگزیکٹو اور شریک بانی ڈیمس ہسابس نے بدھ کے روز خبردار کیا ہے کہ سائبر حملوں اور اے آئی ایجنٹس کے ذریعے کی جانے والی حالیہ ہیکنگ کے واقعات ایک خودکار دور کی ابتدائی جھلک ہیں۔
انہوں نے زور دیا کہ اگر عالمی سطح پر سیکیورٹی اقدامات کو فوراً سخت نہ کیا گیا تو دنیا کو جلد ہی سنگین خطرات اور رکاوٹوں کا سامنا کرنا پڑ سکتا ہے۔
اے آئی ماڈلز اور ایجنٹس کے غیر متوقع و سرکش رویوں، بشمول نیٹ ورک ہیکنگ اور اینتھروپک کے حالیہ انکشاف جس میں ایک خودکار اے آئی ماڈل نے پولس کو قتل کی جھوٹی اطلاع بھیجی نے محققین کو تشویش میں مبتلا کر دیا ہے اور اس تیزی سے بڑھتی ہوئی ٹیکنالوجی کے خطرات کو نمایاں کر دیا ہے۔
بین الاقوامی قوانین اور حفاظتی فریم ورک کی ضرورت
ڈیمس ہسابس نے بتایا کہ اے آئی کے نازک سسٹمز کو محفوظ بنانے کے لیے بائیولوجی اور نیوکلیئر جیسے شعبوں سے تجربات اور نظریات حاصل کرنے پر کام جاری ہے تاہم آخر کار ایک بین الاقوامی ریگولیٹری فریم ورک قائم کرنا ہی پڑے گا۔
ڈیمس کا کہنا تھا کہ یہ ہیکنگ واقعات ہمارے لیے ابتدائی الرٹ ہیں کہ فی الوقت یہ سسٹمز اتنے زیادہ طاقتور نہیں ہیں، اسی لیے فی الحال ہونے والے واقعات اتنے بڑے نہیں ہیں۔
آنے والے برسوں کے خطرات
انہوں نے کہا کہ اگر ہم بطور انڈسٹری، انفرادی کمپنیوں اور حکومتوں کی سطح پر ان سسٹمز کو محفوظ بنانے کے لیے مزید کام نہیں کرتے تو اگلے ایک سے 2 سالوں میں یہ خطرات انتہائی شدید ہو سکتے ہیں۔
عالمی صنعت اور قانون سازی کا مؤقف
کانفرنس کے دوران مائیکروسافٹ کے صدر بریڈ اسمتھ نے بھی اظہار خیال کرتے ہوئے کہا کہ اے آئی کے غیر متوقع رویوں نے سال 2026 کو ایک لمحہ فکریہ بنا دیا ہے۔
ان کا کہنا تھا کہ ٹیکنالوجی کی اس تیز رفتاری کا مقابلہ کرنے کے لیے سخت اور مربوط اے آئی سیفٹی قوانین کی شدید ضرورت ہے۔
ڈیمس نے وضاحت کی کہ اگرچہ ایک بین الاقوامی ادارے کا قیام ناگزیر ہے لیکن اس کی کارروائیاں اور طریقہ کار ایسا ہونا چاہیے جو جدید ترقیافتہ ایجادات اور جدت میں رکاوٹ نہ بنے۔ ان کے بقول ایک ایسا متحرک سرٹیفیکیشن پروسیس بنانا ہوگا جو خطرات کے تناسب کے مطابق فوری طور پر خود کو تبدیل کر سکے۔
