برطانیہ میں منشیات کی بڑے پیمانے پر سپلائی اور منی لانڈرنگ میں ملوث گینگ کے 12 ارکان کو مجموعی طور پر 100 سال سے زائد قید کی سزائیں سنا دی گئیں۔ پولیس کے مطابق گینگ یارکشائر، ہمبر اور دیگر علاقوں میں 135 کلوگرام سے زائد منشیات کی فراہمی میں ملوث تھا، جبکہ کارروائی کے دوران 55 کلوگرام کوکین اور ہیروئن برآمد کی گئی۔
ویسٹ یارکشائر پولیس کے محکمہ انسدادِ سنگین اور منظم جرائم کے مطابق بریڈفورڈ میں قائم گینگ کا سرغنہ 35 سالہ ادریس خان تھا، جو منشیات کی ترسیل کے لیے قابلِ اعتماد کوریئرز کا نیٹ ورک استعمال کرتا تھا۔ اس نیٹ ورک میں عاکف ہاشمی اور ابراہیم سجاد بھی شامل تھے۔
پولیس کے مطابق اگست 2025 میں عاکف ہاشمی کو گرفتار کیا گیا تو اس کے قبضے سے 20 کلوگرام کوکین، 23 کلوگرام ہیروئن اور کریک کوکین کے تین پیکٹ برآمد ہوئے، جن کی مجموعی مالیت 43 لاکھ پاؤنڈ بتائی گئی۔ اس کی اہلیہ کرن محمود بھی موقع پر موجود تھی، جسے بعد میں گرفتار کر لیا گیا۔
تحقیقات میں انکشاف ہوا کہ 38 سالہ ابراہیم خان اور اس کے قریبی ساتھی عاطف علی نے دو ماہ کے دوران 31 کلوگرام ہیروئن اور کوکین کی ترسیل کا انتظام کیا۔ ابراہیم خان کو اپریل 2025 میں منشیات کی فراہمی کے شبہے میں گرفتار کیا گیا تھا اور اس کے قبضے سے دو موبائل فون بھی ضبط کیے گئے۔
پولیس کے مطابق موبائل فونز سے حاصل ہونے والے شواہد سے معلوم ہوا کہ ابراہیم خان گینگ کے ساتھ براہِ راست رابطے میں تھا اور بڑے پیمانے پر منشیات کی ترسیل کا انتظام کرتا تھا۔ اگست 2024 سے اپریل 2025 کے دوران اس نے 52 کلوگرام سے زائد منشیات کی سپلائی کی نگرانی کی اور 3 لاکھ 64 ہزار 992 پاؤنڈ وصول کیے۔
بریڈفورڈ کراؤن کورٹ نے 12 اکتوبر کو مقدمے کی سماعت کے بعد ملزمان کو مختلف مدت کی قید کی سزائیں سنائیں۔ ابراہیم خان اور عاطف علی کو 14 سال 9 ماہ، ادریس خان کو 16 سال، عاکف ہاشمی کو 13 سال 3 ماہ، محسن میاں کو 12 سال 4 ماہ، مائیکل لٹل ووڈ کو 10 سال 6 ماہ اور ابراہیم سجاد کو 7 سال 6 ماہ قید کی سزا سنائی گئی۔
نور حامد خان کو 6 سال 3 ماہ، محمد عثمان نامی دونوں ملزمان میں سے ہر ایک کو 5 سال 3 ماہ، محمد چوہدری کو 4 سال 6 ماہ اور کرن محمود کو 3 سال 9 ماہ قید کی سزا دی گئی۔
پولیس کے مطابق محسن بنگش نے کوکین اور ہیروئن کی فراہمی کی سازش میں ملوث ہونے کا اعتراف کیا، جبکہ لقمان پٹیل کو مقدمے کی سماعت کے بعد انہی الزامات میں قصوروار قرار دیا گیا۔ دونوں کو 28 اکتوبر کو بریڈفورڈ کراؤن کورٹ میں سزا سنائی جائے گی۔
ویسٹ یارکشائر پولیس کے ڈیٹیکٹو انسپکٹر کیون ڈیلی نے کہا کہ یہ ایک پیچیدہ تحقیقات تھی، جس میں بڑے پیمانے پر منشیات کی فراہمی کی سازش بے نقاب کرنے کے لیے متعدد پولیس اہلکاروں نے حصہ لیا۔
ان کا کہنا تھا کہ غیر قانونی منشیات کی تجارت جرائم اور سنگین تشدد کو فروغ دیتی ہے، جس کے معاشرے پر تباہ کن اثرات مرتب ہوتے ہیں۔ پولیس نے منظم جرائم پیشہ گروہ کے مختلف درجوں کے خلاف کارروائی کرکے ان افراد کو نشانہ بنایا جو جرائم سے بھاری منافع کما رہے تھے۔
