سردیوں کی آمد آمد ہے اور اس کے ساتھ ہی گرم مشروبات، سوپ اور مختلف خشک میوہ جات کا شوق بھی بڑھ جاتا ہے۔ ان ہی پسندیدہ چیزوں میں مونگ پھلی بھی شامل ہے۔ سردیوں میں دھوپ میں بیٹھ کر مونگ پھلی کھانا بہت سے لوگوں کو پسند ہے، لیکن اس کے ساتھ ایک پرانی بات بھی عام ہے کہ مونگ پھلی کھانے کے فوراً بعد پانی نہیں پینا چاہیے۔
بزرگوں کا خیال ہے کہ ایسا کرنے سے گلا خراب، کھانسی یا نزلہ زکام ہوسکتا ہے۔ لیکن کیا واقعی پانی اور مونگ پھلی کا ایسا کوئی تعلق ہے؟ اس بارے میں سائنسی معلومات اور روایتی طریقہ علاج کیا کہتا ہے۔
روایتی طور پر کہا جاتا ہے کہ مونگ پھلی جسم میں گرمی پیدا کرتی ہے اور اس کے فوراً بعد ٹھنڈا پانی پینے سے گلے میں خراش یا کھانسی ہوسکتی ہے۔ تاہم سائنسی نقطۂ نظر سے مونگ پھلی کھانے کے بعد پانی پینا عام طور پر محفوظ سمجھا جاتا ہے۔ پانی ہاضمے کے عمل میں مدد دیتا ہے اور جسم کو غذائی اجزا جذب کرنے میں بھی معاون ہوتا ہے۔
مونگ پھلی میں قدرتی تیل اور خشک ذرات موجود ہوتے ہیں۔ حساس گلے والے بعض افراد کو اسے کھانے کے فوراً بعد پانی پینے سے گلے میں ہلکی خراش، گدگدی یا اچانک کھانسی محسوس ہوسکتی ہے۔ تاہم یہ ضروری نہیں کہ ہر شخص کے ساتھ ایسا ہو۔
اسی وجہ سے اگر کسی شخص کو مونگ پھلی کے بعد پانی پینے سے بار بار بے آرامی محسوس ہوتی ہے تو وہ کچھ دیر انتظار کرکے پانی پی سکتا ہے۔
حکیمی اصولوں کے مطابق کھانے کے فوراً بعد بہت زیادہ پانی پینے سے ہاضمے کے عمل پر اثر پڑ سکتا ہے۔ اسی لیے 10 سے 15 منٹ انتظار کرنے کے بعد پانی پینے کا مشورہ دیا جاتا ہے۔
مجموعی طور پر پانی پینا محفوظ ہے لیکن گلے کی حساسیت سے بچنے کے لیے تھوڑا انتظار کرنا فائدہ مند رہتا ہے۔ اس دوران بہت زیادہ ٹھنڈا پانی پینے کے بجائے عام درجہ حرارت کا پانی استعمال کریں اور اگر آپ کو مونگ پھلی کھانے سے کسی بھی قسم کی الرجی یا تکلیف محسوس ہو تو اپنے معالج سے ضرور مشورہ کریں۔
