وزارت اطلاعات و نشریات نے الجزیرہ کی جانب سے اسلام آباد میں سڑکوں کی بندش سے متعلق رپورٹ پر فیکٹ چیک جاری کر دیا۔
وزارت کے مطابق کوئی سڑک بند نہیں کی گئی۔ یہ کنٹینرز اسلام آباد ہائیکورٹ کی ہدایات کی تعمیل میں شہریوں کی جان، مال اور قانونی نقل و حرکت کے تحفظ کے لیے احتیاطی تدابیر کے طور پر رکھے گئے ہیں۔
وزارت کا کہنا ہے کہ یہ حفاظتی اقدامات ماضی میں متعلقہ جماعت کے پرتشدد طرز عمل کے پیش نظر عوامی انفراسٹرکچر اور حساس تنصیبات کے تحفظ کے لیے کیے گئے ہیں۔
وزارت اطلاعات نے کہا کہ توقع کے مطابق الجزیرہ نے ان اقدامات کو یکطرفہ طور پر ’روڈ بلاک‘ کے طور پر پیش کیا جبکہ اس حقیقت کو نظر انداز کر دیا کہ تمام سڑکیں کھلی ہیں اور یہ اقدامات عدالتی اور سکیورٹی تناظر میں ریاست کی امن و عامہ برقرار رکھنے کی ذمہ داری کے تحت کیے گئے ہیں۔
وزارت نے مزید کہا کہ اس طرح کی جانبدارانہ رپورٹنگ جان بوجھ کر گمراہ کن اور منفی تاثر پیدا کرتی ہے۔ الجزیرہ کے جھوٹ اور پروپیگنڈے کی فریب کاری حقائق کا متبادل نہیں بن سکتی۔
