ایران نے دعویٰ کیا ہے کہ جنگ بندی سے متعلق تازہ ترین تجویز پر واشنگٹن کی جانب سے باضابطہ جواب موصول ہو گیا ہے۔
یہ پیش رفت ایک ایسے وقت میں ہوئی ہے جب چند روز قبل ہی امریکی صدر ڈونلڈ ٹرمپ نے ایرانی تجویز کو مسترد کرنے کا دعویٰ کیا تھا۔
دوسری جانب عراق میں قائم آخری امریکی فوجی اڈے سے تمام امریکی افواج کے مکمل انخلا کا عمل مکمل ہو گیا ہے، جسے ایران اور اس کے اتحادی اپنی ایک بڑی تاریخی فتح کے طور پر دیکھ رہے ہیں۔
امریکی انخلا کا یہ مرحلہ ایک ایسے وقت میں مکمل ہوا ہے جب سال 2003ء کے بعد سے شروع ہونے والی اس جنگ میں 4 ہزار 500 سے زائد امریکی فوجی اور دو لاکھ سے زائد عراقی شہری اپنی جانوں سے ہاتھ دھو بیٹھے تھے۔
عراق میں ایرانی حمایت یافتہ مسلح گروہوں کے اتحاد ’اسلامی مزاحمت‘ کے ایک کمانڈر ابو مجتبیٰ الیاسری نے اس انخلا پر خوشی کا اظہار کرتے ہوئے کہا کہ ”یہ عراقی اسلامی مزاحمتی گروہوں اور غیرت مند عراقیوں کے لیے ایک تاریخی فتح ہے اور یہ امریکی منصوبے کے لیے ایک عبرت ناک شکست ہے۔“
تاہم بغداد سے تعلق رکھنے والے سیاسی تجزیہ کار احمد یونس کا کہنا ہے کہ ”مغربی فوج کی موجودگی کے خاتمے سے اس بات کا امکان بڑھ گیا ہے کہ ایران کے اتحادی گروہ خود کو مزید طاقتور محسوس کریں گے، اور وہ سرکاری پالیسیوں پر اپنے اثر و رسوخ اور کلیدی اداروں میں اپنے وجود کو مزید مضبوط کرنے کی کوشش کریں گے۔“
ایران اور امریکا و اسرائیل کے درمیان جاری تنازع اب اپنے آٹھویں مہینے میں داخل ہو چکا ہے۔
ایران نے گزشتہ ہفتے ایک تجویز پیش کی تھی جس کے تحت امریکا ایرانی بندرگاہوں کی ناکہ بندی ختم کرے گا، جبکہ جواب میں ایران سات دنوں کے اندر آبنائے ہرمز میں جہاز رانی کا سلسلہ بحال کر دے گا۔
ایران کے وزیرِ خارجہ عباس عراقچی نے تصدیق کی کہ قطر کے ثالثوں نے نیویارک میں ہونے والی بات چیت کے بعد تہران کو امریکی ردِعمل سے آگاہ کر دیا ہے۔
اطلاعات کے مطابق دونوں فریقین بنیادی اقدامات پر متفق ہیں لیکن ان کے عمل درآمد کی ترتیب پر اب بھی اختلافات موجود ہیں۔
دوسری جانب امریکی صدر ڈونلڈ ٹرمپ نے ایرانی طاقت کے کمزور ہونے کا دعویٰ کرتے ہوئے صحافیوں سے گفتگو کے دوران کہا کہ ”مجھے معلوم نہیں کہ وہ ابھی تسلیمِ شکست کریں گے یا نہیں، لیکن وہ آخر کار تسلیمِ شکست کر لیں گے کیونکہ ان کی حالت بہت خراب ہے۔“
تاہم تہران اور اس کی فورسز اب بھی خطے اور آبنائے ہرمز میں اپنا اثر و رسوخ برقرار رکھے ہوئے ہیں۔
اس تنازع کے نتیجے میں بڑھتی ہوئی مہنگائی اور عالمی توانائی کے بحران نے امریکی سیاست پر بھی گہرے اثرات مرتب کیے ہیں، جہاں آئندہ چند ہفتوں میں وسط مدتی انتخابات ہونے والے ہیں۔
ایران کے پاسدارانِ انقلاب نے امریکی عوام کے نام ایک کھلے خط میں اپریل کرتے ہوئے کہا ہے کہ ”ان بدعنوان اور پرتشدد سیاست دانوں کو اقتدار سے ہٹا دیں جو امریکہ کی موجودہ صورتحال کے ذمہ دار ہیں، اور اپنے سیاست دانوں کو یہ سمجھائیں کہ اب دنیا بدل چکی ہے۔“
