امریکی جیوری نے آئی فون اور ایپل واچ کی ہیپٹک ٹیکنالوجی میں پیٹنٹ حقوق کی خلاف ورزی پر ایپل کو سان ڈیاگو کی کمپنی ’ٹیکشن‘ کو ریکارڈ 5.7 بلین ڈالر ادا کرنے کا حکم دیا ہے۔
جمعہ کے روز امریکی جیوری نے اپنے فیصلے میں قرار دیا کہ ایپل کا ’ٹیپٹک انجن‘، جو آئی فونز اور ایپل واچز میں وائبریشن اور ٹچ فیڈ بیک پیدا کرتا ہے، ٹیکشن کمپنی کے 2 پیٹنٹ شدہ حقوق کی خلاف ورزی کا مرتکب ہوا ہے۔
یہ امریکا کی تاریخ میں پیٹنٹ کی خلاف ورزی کا اب تک کا سب سے بڑا فیصلہ قرار دیا جا رہا ہے۔
ٹیکشن کے وکیل لینس یانگ نے فیصلے پر مسرت کا اظہار کرتے ہوئے کہا کہ وہ جیوری کے اس فیصلے پر انتہائی خوش ہیں، جس نے ٹیکشن کے حق میں فیصلہ دے کر اس کے قانونی پیٹنٹ حقوق کی مکمل توثیق کی ہے۔
ایپل کا مؤقف اور اعلیٰ عدالت میں اپیل کا اعلان
دوسری جانب ٹیک ٹائیکون ایپل نے اس فیصلے کو تسلیم کرنے سے انکار کرتے ہوئے فیصلے کے خلاف اعلیٰ عدالت میں اپیل کرنے کا اعلان کیا ہے۔
ایپل کے ترجمان نے اپنے باضابطہ بیان میں کہا کہ کمپنی کا ’ٹیپٹک انجن‘ ٹیکشن کی ٹیکنالوجی سے بنیادی طور پر بالکل مختلف ہے۔
ایپل کا مزید کہنا تھا کہ مقدمے کی سماعت کے دوران خود ٹیکشن کی جانب سے ایپل کی پروڈکٹس کے کیے گئے ٹیسٹوں نے بھی اس بات کی تصدیق کی تھی۔
کمپنی نے واضح کیا کہ ’ایپل ٹیکشن کی ٹیکنالوجی استعمال نہیں کرتا اور ہم اس فیصلے کے خلاف اپیل کریں گے۔‘
قانونی جنگ کے مراحل
ٹیکشن کمپنی، جو بنیادی طور پر ہیڈ فونز اور گیمنگ ہیڈ سیٹس میں اپنی ٹیکنالوجی استعمال کرتی ہے، نے 2021 میں ایپل کے خلاف یہ قانونی چارہ جوئی شروع کی تھی۔
اس وقت ایپل نے تمام الزامات کو مسترد کرتے ہوئے ٹیکشن کے پیٹنٹس کو ہی غیر معتبر قرار دینے کا مؤقف اپنایا تھا۔
اس کیس کی قانونی تاریخ پر نظر ڈالی جائے تو 2023 میں سان ڈیاگو کے ایک وفاقی جج نے ایپل کے حق میں فیصلہ دیتے ہوئے کہا تھا کہ کمپنی نے پیٹنٹ کی خلاف ورزی نہیں کی۔
تاہم گزشتہ سال ’یو ایس کورٹ آف اپیلز فار دی فیڈرل سرکٹ‘ نے اس کیس کو دوبارہ زندہ کرتے ہوئے سماعت کی منظوری دی، جس کے نتیجے میں امریکی جیوری کا یہ ریکارڈ ساز فیصلہ سامنے آیا ہے۔
