وزیراعظم شہباز شریف نے جمعرات کو نیویارک میں اقوام متحدہ کی جنرل اسمبلی کے 81 ویں اجلاس کے موقع پر ایرانی صدر مسعود پزشکیان سے ملاقات کی ہے۔ وزیراعظم آفس کے مطابق ملاقات میں پاک ایران تعلقات اور خطے کی موجودہ صورت حال پر تبادلہ خیال کیا گیا۔
وزیراعظم آفس کی جانب سے جاری بیان کے مطابق جنرل اسمبلی کی سائیڈلائن پر ہونے والی اس ملاقات میں وزیراعظم شہباز شریف اور ایرانی صدر مسعود پزشکیان نے باہمی تعلقات سمیت علاقائی امور پر گفتگو کی۔
ملاقات میں نائب وزیراعظم اور وزیر خارجہ اسحاق ڈار، وزیر دفاع خواجہ آصف اور وزیراعظم کے معاون خصوصی طارق فاطمی بھی موجود تھے جب کہ ایرانی وزیر خارجہ عباس عراقچی نے بھی اس ملاقات میں شرکت کی۔
یہ پیش رفت ایسے وقت میں سامنے آئی ہے جب اقوام متحدہ کی جنرل اسمبلی کے اجلاس کے دوران واشنگٹن اور تہران کے درمیان دوبارہ سفارتی رابطوں کی کوششیں تیز ہوئی ہیں۔ امریکی اور بین الاقوامی میڈیا کی رپورٹس کے مطابق پاکستان اور قطر ایک بار پھر امریکا اور ایران کو مذاکرات کی میز پر واپس لانے کے لیے متحرک ہیں۔
اقوام متحدہ کی جنرل اسمبلی کے اجلاس کے موقع پر صحافیوں سے گفتگو کرتے ہوئے وزیراعظم شہبازشریف نے کہا کہ پاکستان کی مکمل توجہ ایران جنگ کے خاتمے کیلئے ثالثی پر مرکوز ہے۔
وزیراعظم شہباز شریف کا کہنا تھا کہ مجھ سمیت صدر ٹرمپ اور ایرانی صدر نے ’اسلام آباد میمورنڈم‘ پر دستخط کیے تھے تاہم بدقسمتی سے اس کے بعد ہونے والے واقعات غیر متوقع تھے۔
انہوں نے کہا کہ ہم نے امید کا دمن نہیں چھوڑا ہے اور دونوں ممالک کے درمیان کشیدگی میں کمی اور پیش رفت کے لیے مکمل طور پر پُرعزم ہیں۔
