چینی صدر شی جن پنگ کے تین روزہ تاریخی دورہ واشنگٹن کے موقع پر امریکی صدر ڈونلڈ ٹرمپ نے جوائنٹ بیس اینڈریوز کے ایئرپورٹ پر خود پہنچ کر ان کا پرتپاک اور غیر معمولی استقبال کیا ہے۔
اس موقع پت ایئرپورٹ کے رن وے پر سو فٹ طویل سرخ قالین بچھایا گیا تھا، جبکہ امریکی فضائیہ کے بینڈ کی دھنوں اور دو روزنہ سپرسونک طیاروں کے فلیگ پاسٹ نے اس استقبالیہ تقریب کو مزید باوقار بنا دیا۔
سنہ 1962 میں امریکی صدر جان ایف کینیڈی کے برطانوی وزیراعظم کے استقبال کے بعد یہ پہلا موقع ہے کہ کسی امریکی صدر نے خود ایئرپورٹ جا کر کسی غیر ملکی سربراہِ مملکت کا استقبال کیا ہو۔
فرسٹ لیڈی میلانیا ٹرمپ اور چینی صدر کی اہلیہ پینگ لی یوان بھی اس موقع پر موجود تھیں۔
میلانیا ٹرمپ نے نجی ٹی وی کو انٹرویو دیتے ہوئے بتایا کہ ان کے شوہر نے چینی صدر کا خود ایئرپورٹ جا کر استقبال کرنے کا فیصلہ اس لیے کیا کیونکہ ان دونوں کے درمیان انتہائی بہترین تعلقات ہیں۔
چینی صدر کے دورے کی ابتدائی معلومات کے مطابق دونوں ممالک کے درمیان جاری تجارتی جنگ کا معاہدہ اب جنوری تک بڑھا دیا گیا ہے، جس میں امریکا کی طرف سے درآمدی ڈیوٹی میں کمی اور چین کی طرف سے نایاب معدنیات کی فراہمی شامل ہے۔
چینی صدر شی جن پنگ نے دورے کے موقع پر اپنے سرکاری بیان میں کہا کہ چین اور امریکا دونوں عظیم قومیں ہیں اور ان کے عوام شاندار اور عظیم ہیں۔
ان کا مزید کہنا تھا کہ دونوں ممالک کو ایک دوسرے کا حریف بننے کے بجائے آپس میں شراکت دار بننا چاہیے، کیونکہ چینی قوم کی عظیم بحالی اور امریکا کو دوبارہ عظیم بنانا ایک ساتھ ممکن ہے جو پوری دنیا کے لیے بھی سود مند ثابت ہوگا۔
اس دورے میں دونوں رہنما مصنوعی ذہانت، ایران سے متعلق کشیدگی، تائیوان کے معاملات اور تجارتی تعلقات پر بند کمرہ ملاقاتوں اور سرکاری اعشائیے میں تفصیلی تبادلہ خیال کریں گے۔
دورے کے دیگر پروگراموں میں میلانیا ٹرمپ چینی صدر کی اہلیہ کو اِیژین آرٹ میوزیم کا دورہ کروائیں گی جبکہ نیشنل آرکائیوز میں دونوں ملکوں کی تاریخی دستاویزات کا مشاہدہ بھی کیا جائے گا۔
اگرچہ دونوں ممالک کے درمیان سفارتی اور تجارتی تنازعات طویل عرصے سے موجود ہیں، لیکن امریکی عوام کی ایک بڑی تعداد چین کے ساتھ تعاون اور پرامن مذاکرات کی حمایت کر رہی ہے، جس سے امید کی جا رہی ہے کہ اس سربراہی اجلاس کے مثبت نتائج برآمد ہوں گے۔
