کراچی کے علاقے احسن آباد واقعے میں ایک ہی خاندان کے 5 افراد کی لاشیں ملنے کے بعد فارنزک سیمپل جمع کرانے کا معاملہ پیچیدہ ہوگیا ہے۔ ذرائع کے مطابق متعلقہ سیمپل جامعہ کراچی میں تاحال جمع نہیں ہوسکے۔
کراچی کے علاقے احسن آباد میں ایک ہی خاندان کے 5 افراد کی لاشیں ملنے کے واقعے میں فارنزک سیمپل جمع کرانے کے معاملے پر تفتیشی ٹیم کو مشکلات کا سامنا ہے۔
ذرائع کے مطابق ڈاکٹر عمر، ان کی اہلیہ اور تین بیٹیوں کے فارنزک سیمپل تاحال جامعہ کراچی میں جمع نہیں ہوسکے، جس کے باعث ان کے ضائع ہونے کا خدشہ ظاہر کیا جا رہا ہے۔
واقعے کی تفتیش کرنے والی ٹیم سیمپل جمع کرانے کے لیے جامعہ کراچی اور سول اسپتال کے درمیان رابطے کررہی ہے۔ ذرائع کے مطابق ڈاکٹر عمر اور ان کے اہلخانہ کے سیمپل سول اسپتال لے جائے گئے تھے، جہاں سے انہیں جامعہ کراچی بھجوانے کے لیے کہا گیا۔
تاہم جامعہ کراچی نے پوسٹ مارٹم رپورٹ کے بغیر فارنزک سیمپل وصول کرنے سے انکار کردیا۔
ذرائع کے مطابق میڈیکو لیگل ڈیپارٹمنٹ کا مؤقف ہے کہ پوسٹ مارٹم رپورٹ تیار کرنے میں وقت درکار ہے، جس کے باعث سیمپل جمع کرانے کا عمل متاثر ہوا ہے۔
