اقوام متحدہ کی جنرل اسمبلی کے سالانہ اجلاس میں ترک صدر رجب طیب اردوان کی تند و تیز تقریر کے دوران اسرائیلی وفد ہال سے واک آؤٹ کر گیا۔
اسرائیلی مندوب ڈینی ڈینن کی قیادت میں اسرائیلی سفارت کار اُس وقت اپنی نشستوں سے اٹھے اور باہر نکل گئے جب صدر اردوان نے غزہ میں جاری مظالم اور مقبوضہ مغربی کنارے میں صیہونی آباد کاروں کے تشدد کا ذکر کیا۔ ترک صدر کے خطاب پر فلسطینی وفد نے بھرپور تالیاں بجا کر ان کے موقف کی حمایت کی۔
اپنے خطاب میں رجب طیب اردوان نے اسرائیل کی کارروائیوں کو شدید تنقید کا نشانہ بناتے ہوئے دنیا پر زور دیا کہ وہ فلسطین کو ایک آزاد اور خودمختار ریاست کے طور پر تسلیم کرے اور جنگ کے خاتمے کے لیے اسرائیل پر دباؤ بڑھائے۔
ترک صدر نے اپنے خطاب میں کہا کہ ہم امریکی صدر ڈونلڈ ٹرمپ کی مدد سے سیز فائر میں اپنا کردار ادا کر چکے ہیں، لیکن اس نام نہاد وقفے کے باوجود غزہ میں 1300 سے زائد شہریوں کو قتل کیا جا چکا ہے۔
انہوں نے مزید کہا کہ حماس اور دیگر فلسطینی گروہوں نے سیز فائر کے فریم ورک کے دوسرے مرحلے کو تسلیم کر لیا ہے لیکن اسرائیل غزہ میں اپنی کارروائیاں ختم نہیں کر رہا ہے اور اس وقت مغربی کنارہ اپنے مشکل ترین دور سے گزر رہا ہے جہاں غیر قانونی صیہونی آباد کار قبضہ کر رہے ہیں۔
انہوں نے غزہ کو دورِ حاضر کا سب سے ظالمانہ اور شرمناک کنسنٹریشن کیمپ قرار دیا اور کہا کہ دنیا ایک ایسی نسل کشی کی سوچ کا سامنا کر رہی ہے جو قتل و غارت سے کبھی نہیں بھرتی، اور انسائیت یا ضمیر رکھنے والا کوئی بھی شخص اس پر آنکھیں بند نہیں کر سکتا۔
