اسلام آباد سے پشاور جانے والی موٹروے ایم ون، ہکلہ سے کنڈل تک ایم 14 اور اٹک خورد کے مقام پر جی ٹی روڈ این 5 ہر قسم کی ٹریفک کے لیے بند کردی گئی ہیں، جبکہ شہریوں کو غیر ضروری سفر سے گریز اور متبادل راستے اختیار کرنے کی ہدایت کی گئی ہے۔
ترجمان نیشنل ہائی ویز اینڈ موٹروے پولیس کے مطابق موٹروے ایم ون اسلام آباد ٹول پلازہ سے چھچھ انٹرچینج تک دونوں اطراف ہر قسم کی ٹریفک کے لیے بند ہے۔ اس کے علاوہ اسلام آباد ٹول پلازہ، فتح جنگ، ترنول، سنگجانی، براہمہ باہتر، برہان، ہزارہ موٹروے، غازی اور چھچھ انٹرچینج بھی بند رہیں گے۔
موٹروے ایم 14 بھی ہکلہ سے کنڈل تک دونوں اطراف سے بند کردی گئی ہے، جبکہ ہکلہ، فتح جنگ، پنڈی گھیپ، کھڑپہ، تراپ، داؤد خیل، کوٹ بیلیاں، عیسیٰ خیل اور کنڈل انٹرچینج بھی بند ہیں۔
موٹروے پولیس کے مطابق جی ٹی روڈ این 5 بھی اٹک خورد کے مقام پر دونوں اطراف سے ٹریفک کے لیے بند ہے۔ شہریوں کو ہدایت کی گئی ہے کہ سفر سے قبل ٹریفک کی صورت حال اور جاری ایڈوائزری کو مدنظر رکھیں اور متعلقہ حکام کی ہدایات پر عمل کریں۔
دوسری جانب موٹروے ایم 2 لاہور سے اسلام آباد ہر قسم کی ٹریفک کے لیے کھلی ہے، تاہم بڑی اور کارگو گاڑیوں کے اسلام آباد داخلے پر پابندی عائد کی گئی ہے۔
