ایپل کے نئے آئی فون 18 پرو میکس کی فروخت شروع ہوتے ہی صارفین میں غیر معمولی جوش و خروش دیکھنے میں آیا، جہاں نئے فون کے شوقین افراد نے اپنی باری یقینی بنانے کے لیے رات بھر انتظار کیا۔ کچھ خریدار تو دبئی مال میں رات 3 بجے ہی پہنچ گئے جبکہ بعض نے ایک ساتھ کئی فونز خریدنے کے لیے لاکھوں روپے خرچ کردیے۔
ایپل کے نئے فلیگ شپ اسمارٹ فونز آئی فون 18 پرو اور آئی فون 18 پرو میکس 18 ستمبر کو متحدہ عرب امارات بھر میں اسٹورز پر فروخت کے لیے پیش کیے گئے۔ ابتدائی طور پر اسٹور سے فون خریدنے کی سہولت ان صارفین تک محدود رہی جنہوں نے پہلے سے پری آرڈر کر رکھا تھا۔
دبئی مال میں خریداروں کی قطاریں صبح 7 بجے کے قریب بننا شروع ہوگئیں، جبکہ متعدد صارفین کا کہنا تھا کہ وہ صبح 5 بجے سے ہی مال کے باہر موجود تھے۔ کچھ شائقین نے تو رات بھی وہیں گزاری۔
دبئی کے رہائشی محمد اور مال نے بتایا کہ وہ رات 3 بجے دبئی مال پہنچ گئے تھے اور پوری رات پارکنگ میں انتظار کرتے رہے۔ نئے فونز میں آئی فون 18 پرو میکس کا برگنڈی رنگ خریداروں کی خصوصی توجہ کا مرکز بنا رہا۔ متعدد افراد اپنے دوستوں اور رشتہ داروں کے لیے ایک سے زیادہ ڈیوائسز خریدتے بھی نظر آئے۔
نئے آئی فون کا سب سے پہلے خریدار بننے والے محمد شاکا کے لیے یہ روایت نئی نہیں۔ وہ گزشتہ برس دبئی میں آئی فون 17 خریدنے والے پہلے شخص بھی تھے۔ ان کا کہنا تھا کہ وہ اعلان ہوتے ہی فوری پری آرڈر کرتے ہیں، جبکہ دوست بھی ان کی مدد کرتے ہیں اور ان کے پاس کچھ ایسی ترکیبیں ہیں جو وہ ظاہر نہیں کرنا چاہتے۔
