پنجاب حکومت نے اسلام آباد ہائیکورٹ کے 14 ستمبر 2026 کو جاری کردہ حکم پر عمل درآمد یقینی بنانے کے لیے صوبے کے تمام انتظامی محکموں، ڈویژنل کمشنرز، ڈپٹی کمشنرز، ریجنل و ضلعی پولیس افسران اور دیگر قانون نافذ کرنے والے اداروں کو تفصیلی ہدایات جاری کردی ہیں۔ جن کے تحت اسلام آباد کی حدود میں کسی بھی مارچ، جلوس یا ریلی میں براہِ راست یا بالواسطہ شرکت کے لیے پنجاب حکومت کے سرکاری وسائل، عوامی فنڈز، گاڑیوں، مشینری، آلات اور اہلکاروں کے استعمال پر پابندی عائد کردی گئی ہے، جبکہ کسی سرکاری ملازم کو ایسی سرگرمی میں شرکت پر مجبور کرنے، اکسانے یا کسی اور ذریعے سے شامل کرنے کی بھی اجازت نہیں ہوگی۔
سرکاری مراسلے میں تمام محکموں کو اپنے ماتحت دفاتر، منسلک اداروں، خودمختار باڈیز، فیلڈ فارمیشنز اور انتظامی کنٹرول میں کام کرنے والے افسران و اہلکاروں تک یہ احکامات فوری پہنچانے کی ہدایت کی گئی ہے۔
خلاف ورزی یا دباؤ کی اطلاع دینے کے لیے ایڈیشنل سیکرٹری داخلہ پنجاب کے دفتر میں ہیلپ لائن بھی قائم کر دی گئی ہے، جہاں کسی سیاسی رہنما، عہدے دار یا دیگر شخص کی جانب سے سرکاری اہلکاروں کو مجبور یا ترغیب دینے کی شکایت درج کرائی جا سکے گی۔ احکامات کی خلاف ورزی میں ملوث کسی افسر یا اہلکار کے خلاف فوری محکمانہ کارروائی کی جائے گی، جبکہ تمام متعلقہ حکام کو عملدرآمد اور تعمیلی رپورٹس 23 ستمبر 2026 تک محکمہ عمل درآمد و رابطہ پنجاب کو جمع کرانے کا حکم دیتے ہوئے معاملے کو انتہائی اہم قرار دیا گیا ہے۔
