امریکی ثالثی میں 26 جون ہونے والے جنگ بندی معاہدے کے باوجود اسرائیلی فوج نے رات گئے لبنان کے جنوبی علاقوں پر فضائی حملے جاری رکھے۔
لبنان کی سرکاری خبر رساں ایجنسی کے مطابق جنوبی علاقے کفر رمان میں اسرائیلی جنگی طیارے نے نصف شب کے بعد ایک رہائشی عمارت کو نشانہ بنایا۔
اس حملے میں 9 افراد شہید ہوگئے جن میں دو معصوم بچے بھی شامل ہیں جبکہ 5 افراد زخمی ہیں جن میں سے ایک کی حالت نازک اور دوسرے کی تشویشناک ہے جب کہ دیگر 3 کی حالت خطرے سے باہر ہے۔
اسی علاقے میں ایک دوسرے حملے میں ایک اور گاڑی کو بھی ڈرون سے نشانہ بنایا گیا جس میں 2 افراد شہید ہوگئے۔ یہ گاڑی حزب اللہ کی اتحادی امل موومنٹ کے طبی امدادی گروپ رسالہ اسکاؤٹس کی تھی۔
اس حملے میں شہید ہونے والے دونوں افراد رسالہ اسکاؤٹس کے طبی عملے کے ارکان تھے اور کسی ریسکیو آپریشن کے لیے جا رہے تھے۔
دوسری جانب اسرائیلی فوج کا کہنا ہے کہ علاقے میں ہتھیار منتقل کرتے ہوئے حزب اللہ کے متعدد ارکان کو دیکھا جنہیں کارروائی میں نشانہ بنایا گیا۔
ترجمان اسرائیلی فوج نے یہ بھی کہا کہ عمارت پر حملے میں شہریوں کی ہلاکتوں سے متعلق رپورٹس کا جائزہ لیا جائے گا۔
اسرائیلی فوج کے بقول حزب اللہ نے اسرائیلی فوج پر دو دھماکا خیز ڈرونز سے حملہ کیا تھا تاہم ان حملوں میں کوئی اسرائیلی فوجی زخمی نہیں ہوا۔
اسرائیلی فوج نے دعویٰ کیا کہ جوابی کارروائی میں جنوبی لبنان کے مختلف علاقوں میں حزب اللہ کے انفرااسٹرکچر، جن میں ایک اسلحہ ڈپو بھی شامل تھا کو فضائی حملوں کا نشانہ بنایا گیا۔
ترجمان اسرائیلی فوج نے بتایا کہ گزشتہ روز حزب اللہ کے ایک الگ ڈرون حملے کے جواب میں نبطیہ میں بھی حزب اللہ کے متعدد جنگجو کو کامیابی سے نشانہ بنایا تھا۔
قبل ازیں اسرائیلی فوج نے دیر الزہرانی میں ایک عمارت کو نشانہ بنانے سے پہلے وہاں موجود افراد کو انخلا کی وارننگ جاری کرنے کا دعویٰ کیا تھا۔
اسرائیلی فوج کے بقول یہ عمارت حزب اللہ کی ایک دہشت گرد تنصیب کے طور پر استعمال ہورہی تھی۔ حزب اللہ کی یہ سرگرمیاں ہمیں عسکری کارروائی پر مجبور کررہی ہیں۔
واضح رہے کہ اسرائیلی فوج اب بھی جنوبی لبنان کے سرحدی علاقوں میں موجود ہے جسے اسرائیل اپنی سیکیورٹی زون قرار دیتا ہے جو سرحد کے ساتھ تقریباً 10 کلومیٹر تک لبنانی علاقے میں پھیلا ہوا ہے۔
