وزیراعظم شہباز شریف نے پاک فضائیہ کی پیشہ ورانہ صلاحیتوں، قربانیوں اور ملکی فضائی حدود کے دفاع میں اس کے کردار کو خراجِ تحسین پیش کرتے ہوئے کہا ہے کہ پاک فضائیہ نے ہر مشکل اور جنگی صورتحال میں اپنی صلاحیتوں کا بارہا لوہا منوایا۔
7 ستمبر کو یومِ فضائیہ کے موقع پر اپنے پیغام میں وزیراعظم نے کہا کہ پاک فضائیہ نے گزشتہ کئی دہائیوں کے دوران فضائی معرکوں میں اپنی پیشہ ورانہ قابلیت، مہارت اور برتری ثابت کی ہے۔
انہوں نے کہا کہ پاک فضائیہ ایک قابلِ فخر ادارہ ہے جس کی تاریخ قربانی، بہادری اور پیشہ ورانہ مہارت سے عبارت ہے۔
‘اس ادارے نے جب بھی قوم نے پکارا، غیر معمولی حوصلے اور عزم کے ساتھ اپنی ذمہ داریاں نبھائیں۔’
وزیراعظم نے ستمبر 1965 کی جنگ کو یاد کرتے ہوئے کہا کہ پاک فضائیہ کے ہوا بازوں نے ملکی فضائی حدود کے تحفظ کے لیے غیر معمولی جذبے اور عزم کا مظاہرہ کیا اور مادرِ وطن کے دفاع میں اپنی جانوں کا نذرانہ پیش کیا۔
شہباز شریف نے کہا کہ 1965 کی جنگ میں پاک فضائیہ کے شاہینوں نے آسمان کی وسعتوں میں اپنے عزم اور جذبے سے کامیابی حاصل کی۔
انہوں نے کہا کہ وطن کے دفاع کے لیے جان قربان کرنے والے شہدا کو خراجِ عقیدت پیش کرنا قومی اعزاز ہے۔
وزیراعظم نے مئی 2025 میں بھارت کے ساتھ ہونے والے معرکہ حق کے دوران پاک فضائیہ کے کردار کو بھی اجاگر کیا۔
انہوں نے کہا کہ پاک فضائیہ نے دیگر مسلح افواج کے ساتھ مکمل ہم آہنگی کے ساتھ دشمن کا مقابلہ کیا اور اپنی صلاحیتوں کا ایک بار پھر بھرپور مظاہرہ کیا۔
انہوں نے پاک فضائیہ کی کارکردگی کو جرات مندانہ قیادت، جنگی عملے کی اعلیٰ حربی مہارت، بہترین منصوبہ بندی اور جدید جنگی صلاحیتوں کے مربوط استعمال کا نتیجہ قرار دیا۔
وزیراعظم کا کہنا تھا کہ جدید ٹیکنالوجی کے حصول، مقامی سطح پر دفاعی صلاحیتوں میں اضافے اور جدید کثیرالجہتی جنگی صلاحیتوں کے باعث پاک فضائیہ نے معرکہ حق میں مؤثر کردار ادا کیا۔
انہوں نے کہا کہ قوم کو فخر ہے کہ پاک فضائیہ نے ایک بار پھر محدود وسائل اور عددی برتری کے باوجود دشمن کا مقابلہ کرنے کی اپنی شاندار روایت کو برقرار رکھا۔
شہباز شریف نے پاک فضائیہ کے لیے مزید پیشہ ورانہ ترقی اور کامیابیوں کے لیے نیک خواہشات کا اظہار کرتے ہوئے کہا کہ انہیں یقین ہے کہ پاک فضائیہ ہمیشہ کی طرح پاکستان کی خودمختاری اور فضائی سرحدوں کے دفاع کے لیے ہر ممکن صورتحال کا مقابلہ کرنے کے لیے تیار رہے گی۔
پاکستان ہر سال 7 ستمبر کو یومِ فضائیہ مناتا ہے، یہ دن 1965 کی جنگ کے دوران پاک فضائیہ کے کردار اور کارکردگی کی یاد میں منایا جاتا ہے اور یومِ دفاع و شہدا کی تقریبات کا حصہ ہے۔
