مہنگی بجلی سے پریشان عوام کے لیے بریُ خبر ہے کہ نیشنل الیکٹرک پاور ریگولیٹری اتھارٹی (نیپرا) نے ملک بھر کے بجلی صارفین کے لیے ماہانہ اور سہ ماہی ایڈجسٹمنٹ کی مد میں بجلی مہنگی کردی ہے جب کہ نیپرا نے بجلی کی قیمتوں میں اضافے کا باضابطہ نوٹیفکیشن بھی جاری کردیا ہے۔
نیپرا کے مطابق جولائی 2026 کی ماہانہ فیول پرائس ایڈجسٹمنٹ کی مد میں بجلی کی قیمت میں 2 روپے 6 پیسے فی یونٹ اضافہ کیا گیا ہے، جس کا اطلاق ستمبر 2026 کے بجلی کے بلوں میں کیا جائے گا۔
ماہانہ فیول پرائس ایڈجسٹمنٹ کے تحت بجلی مہنگی کیے جانے سے ملک بھر کے بجلی صارفین پر تقریباً 33 ارب روپے کا اضافی بوجھ منتقل ہوگا۔
نیپرا نے ماہانہ ایڈجسٹمنٹ کے ساتھ ساتھ اپریل تا جون 2026 کی سہ ماہی ایڈجسٹمنٹ کی مد میں بھی بجلی مہنگی کرنے کا فیصلہ جاری کردیا ہے۔ سہ ماہی ایڈجسٹمنٹ کے تحت بجلی کی قیمت میں 52 پیسے فی یونٹ اضافہ کیا گیا ہے۔
نیپرا نے اپریل سے جون 2026 کی سہ ماہی ایڈجسٹمنٹ کا فیصلہ وفاقی حکومت کو بھجوا دیا ہے جب کہ اس کا اطلاق ستمبر سے نومبر 2026 تک 3 ماہ کے لیے ہوگا۔ سہ ماہی ایڈجسٹمنٹ کے تحت ہونے والے اضافے کا اطلاق کے الیکٹرک کے صارفین پر بھی کیا جائے گا۔
نیپرا کے مطابق سہ ماہی ایڈجسٹمنٹ کے نتیجے میں بجلی صارفین پر مزید 12 ارب 67 کروڑ روپے کا اضافی بوجھ پڑے گا۔
یوں ماہانہ فیول پرائس ایڈجسٹمنٹ اور سہ ماہی ایڈجسٹمنٹ دونوں کو ملا کر بجلی صارفین پر مجموعی طور پر تقریباً 45 ارب 67 کروڑ روپے کا اضافی مالی بوجھ منتقل ہوگا۔
ماہانہ ایڈجسٹمنٹ کا اضافہ ستمبر 2026 کے بجلی بلوں میں جبکہ سہ ماہی ایڈجسٹمنٹ کا اضافی چارج ستمبر، اکتوبر اور نومبر 2026 کے بلوں میں شامل کیا جائے گا۔ دونوں اضافوں کا اطلاق کے الیکٹرک سمیت ملک بھر کے متعلقہ بجلی صارفین پر ہوگا۔
نیپرا کی جانب سے بجلی کی قیمتوں میں اضافے کا باضابطہ نوٹیفکیشن جاری کیے جانے کے بعد ستمبر سے صارفین کو بجلی کے بلوں میں اضافی ادائیگی کرنا ہوگی۔
