لاہور ضلعی انتظامیہ نے بسنت 2027 کے لیے پتنگ اور متعلقہ سامان تیار کرنے والوں کی رجسٹریشن 5 ستمبر سے شروع کرنے کا اعلان کردیا۔ آئندہ سال 12 سے 14 مارچ تک ہونے والے میلے کے لیے سخت نگرانی اور حفاظتی اقدامات کے تحت صرف منظور شدہ پتنگیں اور سوتی ڈور استعمال کرنے کی اجازت ہوگی۔
لاہور انتظامیہ کے مطابق پتنگ سازوں کے لیے رجسٹریشن بسنت 2027 کے مخصوص پورٹل کے ذریعے لازمی ہوگی، جبکہ فی الحال صرف مینوفیکچررز رجسٹریشن کرا سکیں گے۔ پتنگ فروشوں، تاجروں اور متعلقہ انجمنوں کی رجسٹریشن جنوری یا فروری 2027 میں شروع کی جائے گی، جس کی تاریخ بعد میں جاری کی جائے گی۔ حکام کا کہنا ہے کہ ابتدائی رجسٹریشن کا مقصد بسنت سے قبل مناسب مقدار میں معیاری اور سستی پتنگوں و دیگر منظور شدہ سامان کی دستیابی یقینی بنانا ہے۔
لاہور کے ڈپٹی کمشنر ریٹائرڈ کیپٹن محمد علی اعجاز کے مطابق بسنت کے لیے پتنگ اور متعلقہ سامان تیار کرنے سے قبل مینوفیکچررز کو این او سی حاصل کرنا ہوگا۔ رجسٹرڈ پیداواری مراکز کی نگرانی اور معائنہ کیا جائے گا تاکہ ممنوعہ سامان کی تیاری یا مارکیٹ میں رسائی روکی جاسکے۔ انتظامیہ نے واضح کیا ہے کہ صرف مقررہ سائز کی پتنگیں اور سوتی ڈور استعمال کی جاسکے گی، جبکہ کیمیکل لگی ڈور اور دھاتی تار کے خلاف زیرو ٹالرنس پالیسی اپنائی جائے گی۔
لاہور میں رواں سال 6 سے 8 فروری تک 18 سال بعد بسنت محدود پیمانے پر بحال کی گئی تھی۔ حکومت نے اسے سخت حفاظتی ضوابط کے تحت بطور پائلٹ منصوبہ شروع کیا تھا، جس میں لاہور کو مختلف رسک زونز میں تقسیم کرنے، سیف سٹی کیمروں اور ڈرونز کے ذریعے نگرانی، چھتوں کی مانیٹرنگ اور موٹر سائیکلوں پر حفاظتی راڈز کی پابندی سمیت متعدد اقدامات شامل تھے۔ بسنت 2027 کے لیے ستمبر ہی میں رجسٹریشن شروع کرنے کا فیصلہ اس بات کی نشاندہی کرتا ہے کہ انتظامیہ اس بار تیاری، نگرانی اور سپلائی چین کی جانچ کے لیے زیادہ وقت حاصل کرنا چاہتی ہے۔
