ہم سب جانتے ہیں کہ زیادہ میٹھی غذائیں دانتوں میں کیڑا لگنے یا سوراخ بننے کا خطرہ بڑھا سکتی ہیں کیونکہ منہ میں موجود نقصان دہ بیکٹیریا شکر کو تیزاب میں تبدیل کرتے ہیں لیکن ماہرین کے مطابق منہ کو صحت مند رکھنے کا تعلق صرف یہ جاننے سے نہیں کہ کیا نہیں کھانا بلکہ اس بات سے بھی ہے کہ کیا کھانا چاہیے۔
سائنسی تحقیق سے منہ میں موجود خردبینی جانداروں کی ایک پوری دنیا کی اہمیت سامنے آرہی ہے۔ اسے منہ کا مائیکرو بایوم کہا جاتا ہے جس میں تقریباً 700 مختلف اقسام کے بیکٹیریا کے علاوہ وائرس، فنگس اور دیگر خردبینی جاندار شامل ہوتے ہیں۔
یہ مائیکرو بایوم صرف دانتوں اور مسوڑھوں کی صحت ہی نہیں بلکہ مجموعی صحت پر بھی گہرا اثر ڈال سکتا ہے۔ ماہرین کے مطابق غذا ان جانداروں کے توازن کو برقرار رکھنے میں اہم کردار ادا کرتی ہے۔
منہ میں اچھے اور برے بیکٹیریا
منہ میں موجود مختلف جراثیم اپنے لیے الگ الگ جگہیں تلاش کرتے ہیں۔ کچھ دانتوں کی سطح پر رہتے ہیں کچھ زبان پر جبکہ بعض دانتوں اور مسوڑھوں کے درمیان موجود انتہائی باریک جگہوں میں پائے جاتے ہیں۔
ان میں کچھ بیکٹیریا نقصان دہ ہوتے ہیں۔ مثال کے طور پر اسٹریپٹوکوکس میوٹنز دانتوں کی سطح پر موجود ہوتا ہے اور شکر کو پسند کرتا ہے۔ یہ شکر کو تیزاب میں تبدیل کرتا ہے جو دانتوں کی حفاظتی تہہ یعنی اینامل کو نقصان پہنچاتا ہے۔ وقت کے ساتھ اس عمل کے نتیجے میں دانتوں میں سوراخ پیدا ہوسکتے ہیں۔
دوسری جانب بعض بیکٹیریا منہ کے لیے فائدہ مند ہوتے ہیں۔ مثال کے طور پر ویلونِیلا، ایکٹینومائسِس، اسٹریپٹوکوکس کی بعض اقسام اور نیسیریا نقصان دہ جراثیم کو منہ میں اپنی جگہ بنانے سے روکنے میں مدد کرسکتے ہیں۔
منہ کے بیکٹیریا پورے جسم کو کیسے متاثر کرسکتے ہیں؟
منہ کے مائیکرو بایوم کا خراب توازن صرف دانتوں اور مسوڑھوں کے مسائل تک محدود نہیں رہتا۔
اگر دانت باقاعدگی سے اور اچھی طرح صاف نہ کیے جائیں تو دانتوں اور مسوڑھوں کے درمیان چھوٹی جیبیں بن سکتی ہیں۔ آکسیجن کی کمی والے ان مقامات پر پورفائروموناس جِنجیوالِس جیسے جراثیم تیزی سے بڑھ سکتے ہیں۔
یہ جراثیم مسوڑھوں کی بیماری کا سبب بن سکتے ہیں اور ماہرین نے انہیں دل کی بیماری، ڈپریشن، الزائمر، ذیابیطس، آنتوں کی سوزش، ریمیٹائڈ آرتھرائٹس اور قبل از وقت بچے کی پیدائش سمیت کئی صحت کے مسائل کے بڑھتے ہوئے خطرے سے بھی منسلک کیا ہے۔
حالیہ برسوں میں سائنس دانوں نے منہ کے خراب مائیکرو بایوم اور بڑی آنت اور لبلبے کے سرطان کے درمیان ممکنہ تعلق بھی تلاش کیا ہے۔
ایک حالیہ تحقیق میں امریکا کے مختلف اداروں سے تعلق رکھنے والے سائنس دانوں نے لوگوں کے لعاب کے نمونے لیے اور بعد میں ان کی صحت کا جائزہ لیا۔ ایسے افراد جن کے منہ کے مائیکرو بایوم میں دانتوں کی خرابی سے منسلک مخصوص بیکٹیریا یا کینڈیڈا نامی فنگس موجود تھی ان میں لبلبے کے سرطان کا خطرہ زیادہ پایا گیا۔
تاہم اس طرح کے تعلقات پر مزید تحقیق جاری ہے اور انہیں بیماری کی براہِ راست وجہ قرار نہیں دیا جاسکتا۔
اچھے بیکٹیریا ’برے‘ جراثیم سے مقابلہ کرتے ہیں
ماہرین کے مطابق منہ میں فائدہ مند بیکٹیریا کی موجودگی دو طرح سے مدد کرسکتی ہے۔ وہ نقصان دہ جراثیم کے ساتھ خوراک اور جگہ کے لیے مقابلہ کرتے ہیں اور یوں ان کی تعداد کو محدود کرسکتے ہیں۔
بعض فائدہ مند بیکٹیریا براہ راست نقصان دہ جراثیم کے خلاف بھی کام کرتے ہیں۔
امریکا کی پنسلوانیا اسٹیٹ یونیورسٹی کی ماہر لورا ویرِچ کے مطابق اسٹریپٹوکوکس خاندان میں ایسے بیکٹیریا بھی موجود ہیں جو زیادہ تیزاب پیدا نہیں کرتے اور ان جراثیم پر حملہ کرسکتے ہیں جو تیزاب پیدا کرتے ہیں۔
مثال کے طور پر ایس سیلیویریئس نامی فائدہ مند بیکٹیریا ایسے پروٹین پیدا کرتا ہے جو مختلف نقصان دہ جراثیم کو ختم کرسکتے ہیں حتیٰ کہ ان میں سے بعض ایسے جراثیم بھی ہیں جو عام اینٹی بایوٹکس کے خلاف مزاحمت رکھتے ہیں۔
سبز پتوں والی سبزیاں فائدہ مند
اگر منہ کے مائیکرو بایوم کو صحت مند رکھنا چاہتے ہیں تو سبز پتوں والی سبزیوں کا زیادہ استعمال مددگار ہوسکتا ہے۔
