پاکستان مسلم لیگ (ن) منارٹی ونگ UAE
کے صدر جان قادر کی زیرِ صدارت ایک مسیحی وفد نے وزیرِ مملکت برائے مذہبی امور و بین المذاہب ہم آہنگی خیل داس کوستانی سے اہم ملاقات کی۔ وفد میں شیپرڈ عمران ، پاسٹر شمعون اقبال، کولمبس بشیر، شہزاد مہنگا اور پاکستان مسلم لیگ (ن) سندھ کے جنرل سیکریٹری کرامت چوہان بھی موجود تھے۔
جان قادر اور وفد کے دیگر اراکین نے وزیرِ مملکت کا تہہ دل سے شکریہ ادا کیا کہ انہوں نے نہایت خلوص اور کھلے دل کے ساتھ وفد کا استقبال کیا، قیمتی وقت دیا اور وفد کی جانب سے پیش کی گئی درخواستوں کو توجہ سے سنا اور ان پر تفصیلی گفتگو کی۔
ملاقات کے دوران وفد نے وزیرِ مملکت کو آگاہ کیا کہ موجودہ لوڈشیڈنگ کے دوران ناظم آباد، سراج کالونی میں قائم انٹر ڈینومینیشنل چرچ کو شدید مشکلات کا سامنا ہے۔ یہ چرچ مقامی مسیحی برادری نے اپنی مدد آپ کے تحت تعمیر کیا تھا اور یہ صرف عبادت گاہ ہی نہیں بلکہ ایک کمیونٹی سینٹر کے طور پر بھی خدمات انجام دے رہا ہے۔یہ چرچ اور کمیونٹی ہال تقریباً 60 سال سے زائد عرصے سے مسیحی برادری کی خدمت کر رہے ہیں۔ جب کسی خاندان کا عزیز وفات پا جاتا ہے تو برادری کے لوگ یہاں جمع ہو کر عبادت اور دعائیہ اجتماع کرتے ہیں۔
وفد نے درخواست کی کہ حکومتِ سندھ کے اقلیتی فنڈ سے اس چرچ کے لیے تقریباً 18 KVA کا سولر سسٹم فراہم کیا جائے، تاکہ لوڈشیڈنگ کے دوران عبادت اور کمیونٹی کی سرگرمیاں بلا تعطل جاری رہ سکیں۔وفد نے وزیرِ مملکت کے سامنے ناظم آباد گولیمار مسیحی قبرستان کی موجودہ خراب صورتحال بھی پیش کی اور درخواست کی کہ قبرستان کی فوری مرمت و بحالی کے لیے اقدامات کیے جائیں۔
وفد نے خصوصی طور پر مطالبہ کیا کہ قبرستان میں مناسب پانی کی سہولت فراہم کی جائے، اندرونی راستے اور چھوٹی گلیاں تعمیر کی جائیں، قبرستان کی صفائی اور مناسب شکل و صورت بہتر بنائی جائے، اور قبروں تک جانے کے لیے مناسب راستے بنائے جائیں تاکہ لوگ اپنے پیاروں کی قبروں پر آسانی سے جا کر دعا کر سکیں۔
وزیرِ مملکت جناب خیل داس کوستانی نے وفد کی درخواستوں کو غور سے سنا اور یقین دلایا کہ دونوں معاملات پر غور و خوض کرکے ممکنہ تعاون اور مدد فراہم کرنے کی کوشش کی جائے گی۔
وفد نے مستقبل میں مزید تفصیلی نشست کے لیے بھی وزیرِ مملکت سے وقت دینے کی درخواست کی، جسے انہوں نے خوش دلی سے قبول کرتے ہوئے آئندہ ملاقات کے لیے تعاون کی یقین دہانی کرائی۔
اس موقع پر وزیرِ مملکت نے پاکستان مسلم لیگ (ن) سندھ کے جنرل سیکریٹری کرامت چوہان کو ہدایت کی کہ وہ مذکورہ دونوں مقامات کا دورہ کرکے موقع کا معائنہ اور انسپیکشن کریں اور اپنی رپورٹ وزیرِ مملکت خیل داس کوستانی کو پیش کریں۔
اس موقع پر پاکستان کی سلامتی، استحکام، ترقی اور خوشحالی اور وزیرِ مملکت خیل داس کوستانی کی صحت، سلامتی اور ان کے خاندان اور میاں محمد نواز شریف، صدرِ پاکستان اور وزیرِاعظم میاں محمد شہباز شریف، افواجِ پاکستان اور بالخصوص فیلڈ مارشل سید عاصم منیر کے لیے بھی دعا کی گئی کہ اللہ تعالیٰ انہیں مزید حکمت، دانائی اور بصیرت عطا فرمائے تاکہ تمام ادارے باہمی تعاون اور یکجہتی کے ساتھ ملک و قوم کی ترقی اور خوشحالی کے لیے کام کرتے رہیں۔
آخر میں پاکستان مسلم لیگ (ن) منارٹی ونگ UAE کے صدر جان قادر اور وفد نے وزیرِ مملکت مذہبی امور و بین المذاہب ہم آہنگی خیل داس کوستانی کا ایک بار پھر تہہ دل سے شکریہ ادا کیا کہ انہوں نے وفد کو وقت دیا، مسائل سنے اور تعاون کی یقین دہانی کرائی۔
