ایران اور امریکا کے درمیان جاری جنگ میں کشیدگی ایک بار پھر خطرناک حد تک بڑھ گئی ہے۔ امریکی صدر ڈونلڈ ٹرمپ نے آبنائے ہرمز کو ’امریکی علاقہ‘ قرار دیتے ہوئے کہا ہے کہ ایران واشنگٹن کے ساتھ معاہدہ کرنا چاہتا ہے، تاہم ابھی وہ ’درست معاہدے‘ کے لیے تیار نہیں۔ دوسری جانب تہران نے امریکا کی نئی پابندیوں کو تمام ممالک کے خلاف اعلانِ جنگ قرار دیتے ہوئے خبردار کیا ہے کہ کسی بھی نئی امریکی دھمکی کا جواب ’تباہ کن‘ ہوگا۔
ایرانی وزارت خارجہ کے ترجمان اسماعیل بقائی نے کہا ہے کہ امریکا کی جانب سے عائد کی جانے والی نئی اقتصادی پابندیاں صرف ایران کے خلاف اقتصادی جنگ نہیں بلکہ تمام خودمختار ممالک کے خلاف اعلانِ جنگ ہیں۔ ان کے مطابق واشنگٹن غیر ملکی بینکوں، کمپنیوں اور ہوائی اڈوں کو تیسرے ملک کے ساتھ جائز تجارت سے روک کر دوسرے ممالک کی خودمختاری میں مداخلت کر رہا ہے۔
دوسری جانب امریکی وزیر خزانہ اسکاٹ بیسنٹ نے کہا ہے کہ نئی پابندیوں کی مزید تفصیلات پیر کو سامنے لائی جائیں گی، جبکہ انہوں نے واضح الفاظ میں کہا کہ امریکا ’ایرانی حکومت کو ختم کرے گا‘۔ تاہم چین نے امریکی پابندیوں اور دباؤ کو مسئلے کا حل قرار دینے سے انکار کرتے ہوئے سفارتکاری پر زور دیا ہے۔
ایرانی مسلح افواج کے چیف آف اسٹاف میجر جنرل علی عبداللہی نے کہا ہے کہ ایران بری، بحری، فضائی، فضائی دفاع اور سائبر شعبوں میں مکمل تیاری رکھتا ہے اور نئی امریکی دھمکیوں کا جواب ’کچل دینے والا، سزا دینے والا اور تباہ کن‘ ہوگا۔
آبنائے ہرمز پر کشیدگی
آبنائے ہرمز اس تنازعے کا سب سے حساس محاذ بن چکا ہے۔ ایران اب بھی میزائلوں اور ڈرونز کی ایسی صلاحیت رکھتا ہے جس کے ذریعے وہ تیل بردار جہازوں کی آمدورفت متاثر کر سکتا ہے۔ جنگ کے باعث عالمی سطح پر ایندھن کی قیمتوں میں بھی اضافہ ہوا ہے۔
امریکا اور ایران اپریل اور جون میں 2 مرتبہ جنگ بندی کا اعلان کر چکے ہیں، تاہم آبنائے ہرمز میں بحری آمدورفت مکمل طور پر معمول پر نہیں آسکی۔ ایران اور عمان نے آبنائے میں جہاز رانی بحال کرنے کے لیے الگ الگ مذاکرات کیے ہیں، لیکن امریکا ایسے کسی معاہدے کی مخالفت کر رہا ہے جس کے تحت جہازوں پر ٹول عائد کیا جائے۔نیٹو کے اعلیٰ ترین فوجی کمانڈر امریکی ایئر فورس جنرل الیکسس گرنکیوچ نے بھی اتحادی ممالک کے سربراہانِ دفاع کے ساتھ ویڈیو کانفرنس کی، جس میں آبنائے ہرمز میں جہاز رانی کی آزادی برقرار رکھنے کے لیے ممکنہ اقدامات پر غور کیا گیا۔ نیٹو کے مطابق یہ اتحاد کا باضابطہ فوجی مشن نہیں، تاہم اتحادی ممالک کی صلاحیتوں کو بروئے کار لانے کے لیے رابطہ کاری کی جا رہی ہے۔رپورٹ کے مطابق ٹرمپ جنگ کے آغاز میں مقرر کیے گئے اپنے اہم اہداف حاصل نہیں کر سکے، جن میں ایران کے جوہری پروگرام کو ختم کرنا اور ایرانی عوام کے لیے مذہبی قیادت کو اقتدار سے ہٹانے کے حالات پیدا کرنا شامل تھا۔
ایرانی پارلیمنٹ کے اسپیکر اور امریکا کے ساتھ بالواسطہ مذاکرات میں اہم مذاکرات کار محمد باقر قالیباف نے کہا ہے کہ واشنگٹن بظاہر اس نتیجے پر پہنچ چکا ہے کہ براہِ راست فوجی محاذ آرائی میں ایران کو شکست دینا ممکن نہیں۔ تاہم انہوں نے یہ بھی اعتراف کیا کہ مسلسل جنگ اور پابندیوں نے ایرانی معیشت پر شدید دباؤ ڈالا ہے۔
قالیباف کے مطابق ایران چاہے کتنی ہی فوجی طاقت رکھتا ہو، اگر عوام بھوکے ہوں، مالی گردش اور اقتصادی ترقی متاثر ہو اور قومی پیداوار کمزور ہو جائے تو ملک زیادہ دیر تک نہیں بچ سکتا۔
ادھر امریکی پابندیوں کی دھمکی کے بعد عالمی منڈی میں خام تیل کی قیمتوں میں اضافہ ہوا ہے، جس سے جنگ کے معاشی اثرات ایران سے نکل کر عالمی توانائی منڈی تک پہنچنے کا خدشہ مزید بڑھ گیا ہے۔
چین، جو ایرانی تیل کا بڑا خریدار ہے، نے امریکا پر زور دیا ہے کہ اقتصادی دباؤ کے بجائے سفارتی راستہ اختیار کیا جائے۔ تاہم واشنگٹن کی جانب سے ایران کی مدد کرنے والے ممالک پر بھی سخت اقتصادی کارروائی کی دھمکی نے امریکا اور چین کے درمیان کشیدگی میں مزید اضافے کے خدشات پیدا کر دیے ہیں۔
یوں ایران جنگ میں ایک طرف فوجی محاذ آرائی جاری ہے تو دوسری جانب امریکا کی ’اقتصادی جنگ‘ اور آبنائے ہرمز کی صورتحال نے بحران کو عالمی توانائی، تجارت اور سفارتی محاذ تک پھیلا دیا ہے۔
