آزاد کشمیر میں حکومت سازی کے حوالے سے گورنمنٹ ہاؤس کشمیر پوائنٹ مری میں مسلم لیگ (ن) کا اہم اجلاس سابق وزیراعظم میاں نواز شریف کی زیرصدارت ہوا ،اجلاس میں آزاد کشمیر کی سیاسی صورتحال اور آئندہ کی حکمت عملی پر تفصیلی غور کیا گیا، ذرائع کے مطابق اجلاس میں وزیراعظم آزاد کشمیر کی نامزدگی کا فیصلہ کر لیا گیا جبکہ خواتین کی مخصوص نشستوں اور اوورسیز کی مخصوص نشست پر بھی امیدواروں کے حوالے سے معاملات طے کر لئے گئے ہیں ۔ذرائع کے مطابق اجلاس میں مخصوص نشستوں کیلئے 10 خواتین کے انٹرویوز بھی کئے گئے ، ذرائع کے مطابق اجلاس میں مسلم لیگ (ن) کی قیادت نے آزاد کشمیر میں حکومت سازی اور اہم عہدوں کے حوالے سے مشاورت مکمل کر لی ،ذرائع کے مطابق طے شدہ نامزدگیوں کا باضابطہ اعلان کل میاں محمد نواز شریف خود کریں گے ، اجلاس کے بعد سابق وزیراعظم نواز شریف اور وزیراعلیٰ مریم نواز لاہورچلے گئے۔
قبل ازیں وزیراعلیٰ پنجاب مریم نواز نے مری مال روڈ کا اچانک دورہ کیا جاری ترقیاتی و تزئین و آرائش کے منصوبوں کا جائزہ لیا، وزیراعلیٰ کی آمد کے موقع پر مال روڈ پر سکیورٹی کے سخت اور غیر معمولی انتظامات کئے گئے تھے ، وزیراعلیٰ مریم نواز شریف نے گاڑی سے ہی مال روڈ کے مختلف حصوں کا معائنہ کیا اور ایکوائر کی گئی عمارتوں سمیت جاری آپریشن کا جائزہ لیا ، اس موقع پر مال روڈ کی ویلی سائیڈ پر جاری فیس اپ لفٹنگ منصوبے کا بھی معائنہ کیا گیا ، وزیراعلیٰ کو مال روڈ پر دیکھ کر سیاحوں نے ہاتھ ہلا کر خوشی کا اظہار کیا جبکہ وزیراعلیٰ نے بھی شہریوں اور سیاحوں کو جواب دیا ، ذرائع کے مطابق وزیراعلیٰ مریم نواز مری کے ڈویلپمنٹ پلان کے حوالے سے اہم اجلاس بھی منعقد کیا جس میں مری میں جاری ترقیاتی منصوبوں، سیاحتی سہولیات اور شہر کی خوبصورتی سے متعلق امور کا جائزہ لیا گیا۔ اجلاس میں (ن )لیگ آزاد جموں و کشمیر کے صدرشاہ غلام قادرسمیت دیگر رہنماؤں نے شرکت کی،وزارت عظمیٰ کے امیدوار کے طور پر شاہ غلام قادرکی پوزیشن مضبوط بتائی جارہی ہے ، طارق فاروق اور کرنل ریٹائرڈ وقار نور بھی دوڑ میں شامل ہیں۔
