امریکی سینیٹ نے روس سے تیل یا قدرتی گیس خریدنے والے بڑے ممالک پر بھاری محصولات عائد کرنے کی اجازت دینے والے نئے پابندیوں کے بل کی منظوری دے دی ہے، جس کے تحت صدر ڈونلڈ ٹرمپ کو بھارت اور چین سمیت روسی توانائی کے بڑے خریداروں کی درآمدات پر 100 فیصد تک اضافی ٹیرف عائد کرنے کا اختیار حاصل ہوگا۔
بھارتی میڈیا کے مطابق روس کے خلاف پابندیوں کا یہ دو طرفہ بل سینیٹ میں 11 کے مقابلے میں 86 ووٹوں سے منظور کیا گیا۔ یہ بل ریپبلکن سینیٹر لنڈسے گراہم کے نام سے منسوب کیا گیا ہے، جو یوکرین کے مضبوط حامی تھے اور 11 جولائی کو انتقال کرگئے تھے۔ ان کی جگہ سینیٹ میں آنے والی ان کی بہن ڈارلین گراہم نے بل کی منظوری کو روسی صدر ولادیمیر پیوٹن کے خلاف سخت اقدام قرار دیا۔
بل کے تحت امریکی صدر کو روس سے تیل یا قدرتی گیس درآمد کرنے والے دنیا کے 5 بڑے خریدار ممالک پر 100 فیصد تک اضافی محصولات عائد کرنے کا اختیار ملے گا۔ بھارت اور چین کے علاوہ آذربائیجان، ہنگری اور سلوواکیہ اس وقت روسی تیل و گیس کے بڑے خریداروں میں شامل ہیں۔
مجوزہ قانون میں ان ممالک کے لیے بعض استثنیٰ بھی شامل ہیں جو روس سے اپنی قدرتی گیس کی درآمدات 15 فیصد سے کم کرچکے ہیں اور روسی توانائی پر انحصار مزید کم کرنے کے لیے اقدامات کررہے ہیں۔
بل میں روسی صدر پیوٹن، اعلیٰ سیاسی و عسکری حکام، روسی مالیاتی اداروں اور توانائی کے منصوبوں پر مزید پابندیاں عائد کرنے کی تجاویز بھی شامل ہیں۔ اس کے علاوہ ایسے پرانے یا دوبارہ رجسٹرڈ آئل ٹینکرز کو بھی پابندیوں کا نشانہ بنانے کی اجازت ہوگی جنہیں روس موجودہ امریکی پابندیوں سے بچنے کے لیے استعمال کرتا ہے۔
تاہم امریکی صدر کو یہ اختیار بھی حاصل ہوگا کہ وہ بعض پابندیوں سے استثنیٰ دے سکیں، بشرطیکہ وہ کانگریس کو یہ یقین دہانی کرائیں کہ ایسا اقدام امریکی قومی مفاد میں ہے
سینیٹ سے منظوری کے بعد بل اب ایوانِ نمائندگان میں جائے گا، جہاں 31 اگست کو اجلاس دوبارہ شروع ہونے کے بعد اس پر غور کیا جائے گا۔ منظوری کی صورت میں اسے صدر ٹرمپ کے دستخط کے لیے بھیجا جائے گا۔
اس قانون میں روس کے علاوہ ایران سے متعلق بھی اہم شق شامل ہے۔ اس کے تحت 1996 کے ایران پابندیوں کے قانون کی مدت 2031 تک بڑھانے کی تجویز دی گئی ہے، جس کے تحت ایران کے توانائی کے شعبے میں سرمایہ کاری کرنے والی کمپنیوں پر پابندیاں عائد کی جاسکتی ہیں۔
امریکی سینیٹ میں بل کے حامیوں کا کہنا ہے کہ نئی پابندیوں کا مقصد روس کی توانائی سے حاصل ہونے والی آمدنی کو محدود کرنا اور یوکرین جنگ کے خاتمے کے لیے ماسکو پر دباؤ بڑھانا ہے۔ دوسری جانب بھارت اور چین جیسے بڑے خریداروں پر 100 فیصد اضافی ٹیرف کی ممکنہ منظوری سے عالمی تجارت اور توانائی کی منڈیوں پر بھی نمایاں اثرات مرتب ہونے کا خدشہ ہے۔
