روس کے بحیرہ اسود کے ساحلی تفریحی مقام ’آرخیپو-اوسیپووکا‘ میں ایک پرہجوم ساحل پر دھماکے کے نتیجے میں 4 بچوں سمیت 7 افراد ہلاک اور متعدد زخمی ہو گئے، جبکہ واقعے کی وجہ سے متعلق روس اور یوکرین نے ایک دوسرے پر الزامات عائد کیے ہیں۔
میڈیا رپورٹس کے مطابق واقعہ پیر کے روز روسی شہر ’گیلینڈژک‘ کے قریب پیش آیا، جہاں بڑی تعداد میں سیاح ساحل پر موجود تھے۔ سوشل میڈیا پر گردش کرنے والی ویڈیوز میں دھماکے کے بعد لوگوں کو خوف و ہراس میں ادھر ادھر بھاگتے دیکھا جا سکتا ہے۔
روسی حکام کا دعویٰ ہے کہ ساحل کو یوکرین کی جانب سے داغے گئے ڈرون نے نشانہ بنایا۔ جنیوا میں روسی مشن نے سوشل میڈیا پلیٹ فارم ’ایکس‘ پر بیان میں اس حملے کو ’خونی حملہ‘ قرار دیتے ہوئے الزام لگایا کہ یوکرین نے جان بوجھ کر شہریوں کو نشانہ بنایا ہے۔
روسی علاقے کراسنودار کے گورنر وینیامین کوندراتییف کے مطابق حملے کا ہدف شہری انفراسٹرکچر تھا اور امدادی و ہنگامی ٹیمیں فوری طور پر جائے وقوعہ پر پہنچ گئیں۔ ان کا کہنا تھا کہ ابتدائی اطلاعات کے مطابق بعض ہلاکتیں ڈرون کا ملبہ گرنے سے ہوئیں۔
دوسری جانب یوکرین کی دفاعی افواج سے وابستہ اہلکار آندری کووالینکو نے روسی مؤقف کو مسترد کرتے ہوئے کہا کہ ہلاکتیں روسی فضائی دفاعی نظام کی کارروائی کے باعث ہوئیں، جس نے ڈرون کو ساحل کے اوپر مار گرایا اور اس کا ملبہ لوگوں پر آ گرا۔
کووالینکو کے مطابق یوکرین صرف روس کے فوجی اور عسکری صنعتی اہداف کو نشانہ بناتا ہے، جبکہ شہریوں کی ہلاکت کی ذمہ داری روسی فضائی دفاعی نظام اور روسی قیادت پر عائد ہوتی ہے۔
تاحال اس واقعے سے متعلق دونوں ممالک کے دعوؤں کی آزاد ذرائع سے تصدیق نہیں ہو سکی ہے۔
