امریکا، یونان اور فرانس میں شدید گرمی اور تیز ہواؤں کے باعث جنگلاتی آگ نے وسیع علاقوں کو اپنی لپیٹ میں لے لیا ہے، جس کے باعث ہزاروں افراد کو محفوظ مقامات پر منتقل کرنا پڑا جبکہ آگ بجھانے کے لیے بڑے پیمانے پر ہنگامی کارروائیاں جاری ہیں۔
امریکی ریاست واشنگٹن میں اسپوکین کے نواحی علاقوں میں پھیلنے والی آگ کے باعث درجنوں رہائشی علاقوں کو خالی کرا لیا گیا ہے۔ حکام کے مطابق تیز ہواؤں اور خشک موسم کے باعث آگ پر قابو پانے میں شدید مشکلات کا سامنا ہے، جبکہ متعدد شاہراہیں بھی بند کر دی گئی ہیں۔
یونان میں جنگلاتی آگ بجھانے کی کارروائی کے دوران دو فائر فائٹنگ ہیلی کاپٹر فضا میں ایک دوسرے سے ٹکرا گئے۔ حادثے کے بعد امدادی کارروائیاں مزید تیز کر دی گئی ہیں، جبکہ کئی دیہات کے مکینوں کو احتیاطاً محفوظ مقامات پر منتقل کر دیا گیا ہے۔
ادھر جنوبی فرانس میں بھی کئی روز سے جاری جنگلاتی آگ تاحال مکمل طور پر قابو میں نہیں آ سکی۔ فرانسیسی حکام نے متعدد علاقوں میں ہنگامی حالت نافذ کرتے ہوئے سیکڑوں فائر فائٹرز، طیاروں اور ہیلی کاپٹروں کو آگ بجھانے کے عمل میں حصہ لینے کے لیے تعینات کر دیا ہے۔
ماہرین ماحولیات کا کہنا ہے کہ یورپ اور شمالی امریکا میں گرمی کی شدید لہریں، خشک سالی اور تیز ہوائیں جنگلاتی آگ کے بڑھتے ہوئے واقعات کی بڑی وجوہات بن رہی ہیں، جس کے باعث موسمیاتی تبدیلی کے اثرات مزید نمایاں ہوتے جا رہے ہیں۔
