بھارتی ریاست مغربی بنگال کے ضلع بیربھوم میں پولیس کی کارروائی کے دوران ایک سابق بس ڈرائیور کے گھر سے بڑی مقدار میں نقد رقم، سونے کی اینٹیں اور کرنسی گننے والی مشینیں برآمد ہونے کا دعویٰ کیا گیا ہے، جس کے بعد معاملہ سیاسی رنگ اختیار کر گیا ہے۔
بھارتی میڈیا کے مطابق منگل کی رات دیر گئے شروع ہونے والی کارروائی بدھ کی شام تک جاری رہی، جہاں ایک بظاہر عام نظر آنے والی 2 منزلہ عمارت اچانک توجہ کا مرکز بن گئی۔
پولیس کے مطابق ضلع بیربھوم کے علاقے محمد بازار میں منار مونڈل نامی شخص کے گھر چھاپے کے دوران اب تک 5 کروڑ 50 لاکھ روپے سے زائد نقد رقم اور 15 کلو سونا برآمد کیا گیا ہے، جبکہ رقم کی گنتی کا عمل جاری تھا۔
منار مونڈل، پتھر کے کاروبار سے وابستہ بتایا جاتا ہے اور وہ تُلو مونڈل کا رشتہ دار ہے، جو پتھر کا بڑا تاجر اور سابق ترنمول کانگریس رہنما انوبرتا مونڈل کا قریبی ساتھی رہ چکا ہے۔ انوبرتا مونڈل کے قریبی حلقوں کے مطابق تُلو مونڈل رواں ماہ کے آغاز میں رتبرتا بینرجی کی قیادت میں قائم باغی گروپ میں شامل ہو گیا تھا۔
پولیس کے مطابق منار مونڈل کئی پتھر کی کانوں اور کرشنگ یونٹس سے بھی منسلک ہے، جن کی ملکیت تُلو مونڈل سے وابستہ بتائی جاتی ہے۔
چھاپے کے دوران پولیس کے متعدد اعلیٰ افسران بڑی نفری کے ساتھ موقع پر موجود رہے، تاہم حکام نے ابھی تک باضابطہ طور پر یہ نہیں بتایا کہ کارروائی کس بنیاد پر کی گئی اور آیا اس کا تعلق مبینہ غیر قانونی مالی معاملات یا کسی اور جرم سے ہے۔
بدعنوانی کے خلاف زیرو ٹالرنس پالیسی کا اعلان
مغربی بنگال کے وزیر اعلیٰ سُویندو ادھیکاری نے بدھ کے روز کہا کہ ان کی حکومت بدعنوانی کے خلاف کارروائیاں جاری رکھے گی اور اس حوالے سے ’زیرو ٹالرنس‘ پالیسی پر عمل کیا جائے گا۔ انہوں نے سماجی رابطے کی ویب سائٹ ایکس پر جاری بیان میں قانون نافذ کرنے والے اداروں کی کارروائی کو سراہتے ہوئے کہا کہ پولیس نے خفیہ اطلاعات کی بنیاد پر محمد بازار تھانے کی حدود میں مبینہ غیر قانونی ریت مافیا کے ٹھکانے پر بڑی کارروائی کی
ادھیکاری نے دعویٰ کیا کہ کارروائی کے دوران غیر قانونی ذرائع سے جمع کی گئی بڑی دولت سامنے آئی، جس میں اب تک 5 کروڑ 50 لاکھ روپے نقد اور 15 کلو سونا شامل ہے۔ انہوں نے کہا کہ عوامی وسائل کو لوٹ کر دولت جمع کرنے والے اور سابق حکمران جماعت کے بااثر افراد سے روابط رکھنے والے کسی شخص کو نہیں بخشا جائے گا۔
ذرائع کے مطابق منار مونڈل ماضی میں ریاستی محکمہ ٹرانسپورٹ کا ملازم تھا اور بس ڈرائیور کے طور پر کام کرتا تھا، بعد ازاں اس نے پتھر کے کاروبار میں قدم رکھا۔
حکام کا کہنا ہے کہ ابھی یہ واضح نہیں ہو سکا کہ اس نے اتنی بڑی رقم کیسے جمع کی اور اس کی آمدنی کے ذرائع کیا تھے، جس کی تحقیقات جاری ہیں۔
2024 کی شاہانہ شادی بھی دوبارہ زیرِ بحث
چھاپے کے بعد تُلو مونڈل کی بیٹی کی 2024 میں ہونے والی شاندار شادی بھی ایک بار پھر خبروں میں آ گئی ہے۔
ذرائع کے مطابق بیربھوم کے علاقے سوری میں منعقد ہونے والی اس شادی پر تقریباً 100 کروڑ بھارتی روپے خرچ کیے گئے تھے، جس میں بنگالی اور بالی ووڈ فلمی شخصیات کو مدعو کیا گیا تھا۔
مہمانوں کی فہرست میں اداکار انکوش ہازرا، درشنا بینک، ارباز خان اور زرین خان سمیت کئی معروف شخصیات شامل تھیں۔
