شارجہ میں سافٹ امیج پاکستان اور خان جی گروپ آف ریسٹورنٹس کی جانب سے “پراؤ ڈ آف یو اے ای” فخورین با لاما رات کا انعقاد کیا گیا جس میں
پاکستانی بزنس کمیونٹی کی اہم شخصیات، پاکستان قونصلیٹ دبئی سے عمران خٹک، سوشل میڈیا انفلوینسرز ، انجینئر جاوید،احسان الہی، عدنان سرفراز،انجینئر فرحان، انجینئر دانش حسین فراز صدیقی،محمد تاج، رضوان کھوکھر، طارق ندیم،حسین وارثی ،خواتین و فیملیز کی ایک بڑی تعداد نے شرکت کی اور یو اے ای کے ساتھ اظہار یکجہتی کا مظاہرہ کیا۔
تقریب کا آغاز حمد کے بعد دونوں ممالک کے قومی ترانوں سے ہوا۔اس موقع پر اماراتی سینئر آرٹسٹ ایکسی لینسی عبداللہ جافلی نے پاکستانیوں کے پیار کا شکریہ ادا کیا اور پاکستان زندہ باد کا نعرہ لگایا۔
صدر پاکستان سوشل سینٹر شارجہ خالد حسین چوہدی،صدر سافٹ امیج پاکستان ملک اسلم،سی ای او خان جی گروپ آف ریسٹورنٹس شکیل احمد اور صدر پی پی پی گلف میاں منیر ہانس نے اپنے خطاب میں یو اے ای کے حکمرانوں امارات کی عوام وشیوخ الامارات کا شکریہ ادا کیا اور کہا کہ ہم صدق دل سے دعا کرتے ہیں کہ یہ سرزمین ہمیشہ امن کا گہوارہ بنی رہے اس ملک کی قیادت سلامت رہے اور یوں ہی اس ملک کی ترقی و خوشحالی کاسفر جاری و ساری رہے۔انہوں نے کہا کہ پاکستانی کمیونٹی کے افراد ہر حال میں امارات اور ان کی قیادت کے ساتھ مکمل یکجہتی کا اعلان کرتے ہیں ہمارا جینا مرنا یو اے ای کے ساتھ ہے۔
اس موقع پر امارات میں مقیم شوقیہ گلوکاروں نے ماضی کے یادگار گیت سنائے اور خوب داد پائی۔ پاکستانی سنگر عینی زیدی نے صوفیانہ کلام اور ملی نغمے گا کر حاضرین کے دل موہ لئے۔
آخر میں سافٹ امیج پاکستان اور خان جی گروپ آف ریسٹورنٹس کی جانب سے فنکاروں کو اعزازی شیلڈ و تحائف سے نوازا گیا۔
