کراچی: یوتھ اسپورٹس اور کھیلوں کے فروغ کے سلسلے میں ینگ مسلم فٹبال گراؤنڈ اورنگی ٹاؤن ویسٹ کے وفد نے ڈپٹی کمشنر کراچی ویسٹ، علی ذوالفقار سے ان کے دفتر میں ملاقات کی۔وفد میں مختلف کھیلوں سے وابستہ ممتاز شخصیات شریک تھیں، جن میں ذاکر خان (فٹبال آرگنائزر)، غلام نبی (گولڈ میڈلسٹ)، مقدس (پاکستان آرمی)، نایاب، استاد فدا حسین (انٹرنیشنل باکسنگ کوچ)، عدنان آفریدی (انٹرنیشنل باکسر)، عائشہ بلوچ (گولڈ میڈلسٹ)، شہزاد اور ارشد (کرکٹ) شامل تھے۔ملاقات کے دوران ینگ مسلم فٹبال گراؤنڈ اورنگی ٹاؤن ویسٹ کی بحالی، نوجوانوں کے لیے کھیلوں کی سہولیات میں بہتری، گراؤنڈ کے تحفظ اور مختلف کھیلوں کے فروغ سے متعلق امور پر تفصیلی تبادلہ? خیال کیا گیا۔ڈپٹی کمشنر ویسٹ علی ذوالفقار صاحب نے وفد کی تجاویز کو سراہتے ہوئے نوجوانوں میں مثبت اور صحت مند سرگرمیوں کے فروغ کے لیے ہر ممکن تعاون کی یقین دہانی کرائی۔وفد نے ڈپٹی کمشنر ویسٹ کا شکریہ ادا کرتے ہوئے امید ظاہر کی کہ باہمی تعاون سے ینگ مسلم فٹبال گراؤنڈ اور دیگر کھیلوں کی سرگرمیوں کو مزید فروغ ملے گا، جس سے علاقے کے نوجوانوں کو بہتر مواقع میسر آئیں گے۔وفد نے اس موقع پر اس عزم کا بھی اظہار کیا کہ نوجوان نسل کو کھیلوں کی جانب راغب کرنے اور انہیں منفی سرگرمیوں سے دور رکھنے کے لیے مختلف اسپورٹس ایونٹس، ٹورنامنٹس اور تربیتی پروگراموں کا انعقاد جاری رکھا جائے گا۔ شرکاء نے اس بات پر زور دیا کہ کھیل صحت مند معاشرے کی تشکیل میں بنیادی کردار ادا کرتے ہیں اور سرکاری اداروں اور مقامی تنظیموں کے باہمی تعاون سے علاقے میں کھیلوں کے مثبت رجحان کو مزید فروغ دیا جا سکتا ہے۔
