برطانوی شاہی خاندان کی مرحوم ڈچس آف کینٹ کی وصیت منظر عام پر آگئی، اپنی وصیت میں 14 لاکھ پاؤنڈ سے زائد مالیت کی جائیداد اپنے شوہر ڈیوک آف کینٹ اور تین بچوں کے نام کی ہے۔
برطانوی میڈیا کے مطابق وصیت سے متعلق جاری ہونے والی قانونی دستاویزات سے معلوم ہوا ہے کہ ڈچس آف کینٹ کی تقریباً 14 لاکھ 30 ہزار پاؤنڈ مالیت کی جائیداد ان کے تین بچوں جارج ونڈسر، لیڈی ہیلن ٹیلر اور لارڈ نکولس ونڈسر کو منتقل کی گئی۔
مرحوم ڈچس نے 2004 میں اپنے تعاون سے قائم ہونے والے خیراتی ادارے فیوچر ٹیلنٹ میوزیشنز کے لیے 10 ہزار پاؤنڈ بھی مختص کیے۔ یہ ادارہ کم آمدنی والے خاندانوں سے تعلق رکھنے والے باصلاحیت نوجوان موسیقاروں کی معاونت کے لیے کام کرتا ہے۔
وصیت کے مطابق انہوں نے اپنے نو مذہبی بچوں (گاڈ چلڈرن) میں سے ہر ایک کے لیے 5 ہزار پاؤنڈ بھی چھوڑے، جبکہ اپنی ذاتی اشیا اپنے شوہر ڈیوک آف کینٹ کے نام کیں۔
ڈچس آف کینٹ گزشتہ سال ستمبر میں مغربی لندن کے کینسنگٹن پیلس میں واقع رین کاٹیج میں اپنے اہل خانہ کی موجودگی میں پُرسکون انداز میں انتقال کرگئی تھیں۔
شہزادہ ولیم اور شہزادی کیٹ کا خراجِ عقیدت
شہزادہ ولیم اور شہزادی کیٹ نے ڈچس آف کینٹ کے انتقال پر انہیں خراجِ عقیدت پیش کرتے ہوئے کہا تھا کہ ان کی دعائیں ڈیوک آف کینٹ اور ان کے خاندان، خصوصاً جارج، ہیلن اور نکولس کے ساتھ ہیں۔
