بھارت کے دارالحکومت نئی دہلی میں ہزاروں طلبہ اور نوجوانوں نے پارلیمنٹ کی جانب مارچ کرتے ہوئے مرکزی وزیر تعلیم دھرمیندر پردھان کے استعفے کا مطالبہ کردیا۔ مبصرین اس احتجاج کو وزیر اعظم نریندر مودی کی تیسری حکومت کو درپیش اب تک کے بڑے سیاسی چیلنجز میں سے ایک قرار دے رہے ہیں۔
یہ احتجاج ’کاکروچ جنتا پارٹی‘ نامی طلبہ تحریک کی جانب سے منظم کیا گیا، جو آن لائن پلیٹ فارم سے ابھرنے والی ایک احتجاجی تحریک ہے۔
تنظیم کا کہنا ہے کہ اس کا مقصد بدعنوانی، نوجوانوں کے لیے روزگار، تعلیمی مواقع کی کمی، اور حکومتی اداروں کی جانب سے نوجوانوں کو نظرانداز کیے جانے کے خلاف آواز بلند کرنا ہے۔
پولیس کی شیلنگ اور لاٹھی چارج
احتجاج کے آغاز میں سیکیورٹی اداروں نے مظاہرے کے حجم کا درست اندازہ نہیں لگایا، تاہم جب مظاہرین نے سرکاری طور پر مختص احتجاجی مقام سے نکل کر پارلیمنٹ کی جانب پیش قدمی کی تو پولیس نے انہیں روکنے کے لیے آنسو گیس کی شیلنگ اور لاٹھی چارج کیا۔
پولیس کارروائی کے دوران متعدد مظاہرین کو حراست میں بھی لیا گیا، تاہم اس کے باوجود ہزاروں افراد پارلیمنٹ کی جانب بڑھنے میں کامیاب ہوگئے، جس کے بعد پارلیمنٹ کی سیکیورٹی پر مامور اہلکاروں نے عمارت کے داخلی راستے بند کرکے حفاظتی اقدامات مزید سخت کر دیے۔
سونم وانگ چک کی گرفتاری نے احتجاج کو مزید ہوا دی
موجودہ احتجاجی لہر گزشتہ جون سے جاری تحریک کا تسلسل ہے، تاہم اس میں اس وقت شدت آئی جب معروف ماہر تعلیم اور سماجی کارکن سونم وانگ چک، جو گزشتہ تین ہفتوں سے بھوک ہڑتال پر تھے، کو پولیس نے تحویل میں لے کر ان کی مرضی اور اہل خانہ کی خواہش کے برعکس ایک سرکاری اسپتال منتقل کر دیا، جہاں اطلاعات کے مطابق انہیں سخت نگرانی میں رکھا گیا ہے۔
تحریک کے رہنماؤں کا کہنا ہے کہ سونم وانگ چک کی جبری منتقلی کے بجائے حکومت کو ان کے مطالبات پر سنجیدگی سے غور کرنا چاہیے تھا، جبکہ اس اقدام نے احتجاج کو کمزور کرنے کے بجائے مزید شدت دے دی۔ اتوار اور پیر کی درمیانی شب ہزاروں نوجوان نئی دہلی کے مرکز میں جمع ہوگئے اور پارلیمنٹ کی جانب مارچ کیا۔
یہ احتجاج ایسے وقت میں سامنے آیا جب وزیراعظم نریندر مودی پارلیمنٹ کے مون سون اجلاس کا افتتاح کرتے ہوئے نوجوانوں کے لیے مواقع اور بھارت کی حالیہ خلائی کامیابیوں کا ذکر کر رہے تھے۔
حکومت اور مظاہرین کے درمیان مذاکرات
بعد ازاں بھارتی حکومت نے تصدیق کی کہ احتجاجی قیادت اور مرکزی وزیر صحت جے پی نڈا کے درمیان ملاقات ہوئی، جس میں مظاہرین نے اپنے مطالبات پیش کیے۔ حکومت نے ان مطالبات پر غور کرنے کی یقین دہانی کرائی۔
وزیر تعلیم کے استعفے اور متاثرہ خاندانوں کے لیے معاوضے کا مطالبہ
احتجاجی تحریک کا بنیادی مطالبہ وزیر تعلیم دھرمیندر پردھان کا استعفیٰ ہے۔
اس کے علاوہ مظاہرین نے ان طلبہ کے اہل خانہ کے لیے ایک کروڑ روپے فی خاندان معاوضے کا مطالبہ بھی کیا ہے جنہوں نے حالیہ مہینوں میں یونیورسٹی داخلہ امتحانات کی منسوخی کے بعد خودکشی کر لی۔ ان امتحانات کو اس وقت منسوخ کیا گیا تھا جب یہ انکشاف سامنے آیا کہ امتحانی سوالات امتحان سے قبل ہی لیک ہو چکے تھے۔
امتحانی پرچوں کا لیک ہونا بڑا مسئلہ قرار
مظاہرین کا کہنا ہے کہ امتحانی پرچوں کا بار بار لیک ہونا بھارت کے سرکاری تعلیمی نظام کا ایک دیرینہ مسئلہ بن چکا ہے، جبکہ موجودہ نظام نوجوانوں کی بڑی تعداد کو اعلیٰ تعلیم کے مساوی مواقع فراہم کرنے میں بھی ناکام رہا ہے۔
’کاکروچ جنتا پارٹی‘ کیسے وجود میں آئی؟
کاکروچ جنتا پارٹی کی بنیاد 31 سالہ سماجی کارکن اور سیاسی مبصر ابھیجیت دپکے نے رکھی۔ اس تحریک کا نام بھارتی سپریم کورٹ کے جج سوریا کانت کے ایک بیان کے ردعمل میں رکھا گیا، جنہوں نے گزشتہ مئی میں عدالت کے دوران سوشل میڈیا پر ریاستی اداروں پر تنقید کرنے والے بے روزگار نوجوانوں کو ’کاکروچ‘ قرار دیا تھا۔
تحریک کے بانیوں کا کہنا ہے کہ اسی بیان نے نوجوانوں کو منظم ہونے اور اپنے حقوق کے لیے آواز بلند کرنے پر آمادہ کیا۔
جنوبی ایشیا میں نوجوانوں کی احتجاجی تحریکیں
رپورٹ کے مطابق گزشتہ پانچ برسوں کے دوران جنوبی ایشیا میں نوجوانوں کی کئی احتجاجی تحریکیں سامنے آ چکی ہیں، جنہوں نے سری لنکا، بنگلہ دیش اور نیپال میں حکومتوں پر نمایاں سیاسی دباؤ ڈالا اور بعض ممالک میں حکومتی تبدیلیوں کا باعث بھی بنیں۔
